TAUMADA, au kerea mo ni vosoti au saka na turaga kei na marama bale ni noda vanua ena vuku ni ulutaga au na tasereka nikua, e dua na ulutaga ka dodonu me da kila ni sa sivia qo e dua na drau tolusagavulu na yabaki (133) ni noda tiko veimaliwai voli mai kei ira na wekada na Idia, ka sa dede eda sega tiko ni veikilai vinaka vakabibi na lotu kei na ka era vakabauta.
Dau levu na gauna eda dau lomatarotaro ka dau vakavuna me tu na siqe ka totowiwi ena so na gauna, ia, au nanuma nisa kena gauna oqo me da kua tale ni were-ubiubi ka sa dodonu me da veitalanoa vakadodonu ka mera vakavulici na luveda mera vakatawa matua de ra vakacalai ena veitabagauna sa bera mai.
Ena vica na macawa sa dromu eda wilika kina nai vakamacala ni nodra lotu, ia, nikua au nanuma me da raica sara mada vakatitobu na mataqali vakabauta e tu vei ira ena vuku ni veikalou-vu era qarava. Taumada, sa dodonu meda kila nai Taukei kei Viti ni o ira na wekada Lotu Idu era qarava na veikalou-vu eso ka dui tu na nodra kaukauwa ena vanua era dui cavutu mai kina se taukena.
Na veikalou-vu era qarava era raica ka okata mera kena waqawaqa na veimanumanu yavai-va, manumanu vuka, veivunikau, uciwai, wasawasa, na cagi, na uca, na matanisiga, na vula kei na bukawaqa.
Dua vei ira na kalou-vu oqori na yacana o Hanuman, ka vaka tu na maqe na kena i rairai, e lima tu na manumanu e dau vodoka mai se kena waqawaqa mai kevaka era sa voroka na lawa ni nona tabu se savasava o ira era dau qaravi koya. Na lima na manumanu oqori e ratou oka kina na ose, na vuaka, na laione, na koli kei na maqe, ka dau kilai talega kina ena yaca na panch-mukh hanuman.
Na kena vakaviti na vosa na panch-mukh na lima na matana se ululima, ka ra dau basika se laurai na veimanumanu oqori ena gauna e taqomaki kina e dua e qaravi Hanuman ena yalodina, se vakarusai ke voroka na kena tabu. Vei keda na i Taukei kei Viti, e dui tu na noda manumanu, ika, kau kei na noda kalou-vu ka viavia tautauvata tiko na vakasama oqori ena vuku ni vakabauta makawa, keda duidui walega ni o ira na wekada lotu Idu era qarava dina ena yalogu.
Oqo e dua na kenai vakaraitaki, ke raica e dua na ose, ena vakaraitaka vua na nona vakarokoroko ena nona maroroya ka susuga vakavinaka na ose, me kua ni via kana ena dua na gauna, ka me raica mera kua ni mokuti koya se vakararawataki ra-ose na tamata, vakabibi o ira na lewe ni nona vuvale.
Na mataqali veivakamenemenei vakaoqo ena laki manoa wale kina na ose ka ni sa dau yaco me kila na vosa, ke kaluvi se drusivi ena gauna e gadrevi kina na nona veivuke me vaka na tabana ni veilakoyaki.
Ni kevaka sa qarava vinaka tiko na nona ose, sa qarava vinaka tiko na nona kalou-vu o Hanuman ka nona waqawaqa talega na ose, se kevaka e vesuki koya tu ka sega ni kauwaitaki koya, me kana se gunu, ena rawa ni yaco vua na kena digodigo ka rawa sara talega ni lutu mai na dela ni ose, bikai koya tale na nona ose se tekei koya tale, nisa cudru o koya na yalo ka vodoki koya tiko.
E dau laurai vakalevu na cudru nei Hanuman ena gauna e cuqu kina na vuaka ena veiteitei baleta nisa dua tiko na cala, ka so na gauna eda dau kaya nai Taukei ni cudru na vanua se kevaka eda kauta mai na vakasama vakalotu, sa cudru na kalou levu.
E sega na laione ena noda vanua, ia mai Idia sa dua na ka na nodra lomana na laione, era sega ni dau vakamatea se vakararawataka, dina ga ni rawa ni kana tamata talega, baleta ni dua tiko vei ira na waqawaqa nei Hanuman o koya. Na maqe (sega talega ni tiko e Viti) e dua na manumanu ka dau dredre me susugi e vale baleta ni dau viavia-tamata tale na nonai vakarau, ka dau vakasevaki ena so na gauna, ia na vanua vinaka ga e rauti koya - aya na vunikau. E nodra i tavi na Lotu Idu ena veisiga mera kauta na veivuanikau eso me vaka na jaina (kena kakana talei), kei na vuanikau kamikamica tale eso ka biuta ena dua na kena vatavata vakarautaki mera kevu sobu mai vakataki Sakaraia na maqe, ka mai vakayagataka se kauta cake ki na veitabanikau, ka vosa vakalougatataki iratou mai na matavuvale oya.
Era vakabauta talega na Lotu Idu ni kevaka era mai kauta na maqe se ra vukataka na manumanu vuka na vuanikau se kakana era bini tu ena kena vatavata se ruku ni veivunikau, era sa kauta vata ka vukataka yani na nodratou leqa kece sara, nuiqawaqawa, rarawa se mosi, ke yacovi koya tiko e dua na matevuce, ka ratou vosoti talega ena veicala e vuqa e ratou vakayacora, ka vakalougatataki mai ena kakana sega ni oti rawa, drodro vinaka tiko ga na medratou wai ni gunu, bulabula ka vuavuaidrau na ka e ratou tea, tawa vinaka na ika mai takali, ka tubu na nodratou rawa-ka, ka laki vakavuna sara na vutuniyau ena veitabana.
Au vakabauta ni a vaka tale tu beka ga oya na nodra vakabauta na noda qase e liu, au rogoca ga, ia ena noqu vakekeli ena tabana ni vosa kei nai tovo vakaviti makawa, e ka dina taucoko, nira dau vaka tu oqori na i tovo ni nodra qaravi kalou na tubuda ena veigauna e liu ni bera nira mai dara nai sulu ni lotu. Ena qai vakuri tale yani!