DINA ni sa mai luvata na i sulu ni Mataivalu o Ratu Nemani Degei, ia na yalo ni veiqaravi ena bula raraba e sebera ni taqusi vua na turaga ni Raravou oqo ena vanua o Nabuavaju , ena yasana vakaturaga o Nadroga.
Ea mani coba tale na i sulu drokadroka ni Mataivalu ka dua vei ira na matai ni turaga me solia yani nona veivuke ena vale ni volavola ni matanitu e Sigatoka ni oti ga e dua na siga ni mai oti na waluvu ena yasayasa vaka Ra ena i ka 30 ni Maji ni yabaki oqo
Na waluvu oqori e vakacaca sara ga vakalevu ena i tikotiko voleka ena veiuciwai lelevu kei na uciwai lalai, loma ni tauni kei na baravi, tekivu mai Momi me kauta cake yani ki Namatakula.
O Degei ea tu ena tabana ni Mataivalu ni noda vanua me tolusagavulu vakacaca na yabaki ka bau cabeta nai tutu vaka sajini mejia.
Ni cegu ga mai na mataivalu ea volia sara e dua nona tolili rua na tani ka me dau vukei koya voli ena veitosoyaki mai nona koro ki tauni o Sigatoka ka lesu tale.
Ia na tolili vata tale ga oqori e nona i kaukau mai me mai veivuke kina vei ira na wekada era mai vakaleqai sara vaka ca ena waluvu.
Niu raica na levu ni vakacaca e tarai ira na lewe ni vanua, e tuburi au e dua na loloma levu ka vaka tale tu e dua na buca ni valu ni oti na veiraravui. tukuna o Degei.
Ni keimami wase kakana e na koro o Semo , au sega ni tarova rawa na wai ni mataqu ena kena sa luvuci au na i tuvaki ca ni koro oqo, ka kena i kuri niu raici ira na marama ka vakabibi o ira na gone, kau vakatautauvata taka ni sa dau vakalutu gasaukurotaki na veivanua mai Lepanoni ena Tokalau e loma ena kena dau bololaki mai vei ira na Mataivalu waqavuka ni Isireli.
Na noqu tolili au sa mani solia ena kena vakayagataki ena kena soli na kakana ,wai ni gunu kei na i sulu.
Au vakavinavinaka tale ga vei ira na i ttokani sotia tu vakawawa (TF) e Nadroga ena nodra sa babasika tale ga mai ni oti ga e vica na siga mera mai veivuke kau vakabauta na bula ni veivukei kei na cakacaka vata keimami mai vulica mai loma ni keba ni Mataivalu e sa curuma tu nodra bula ka levu tale ga era sa veiqaravi oti mai na buca ni valu mai na Tokalau e Loma ka sega ni ka vou vei ira na veiqaravi ena gauna ni leqa tubu koso, e kaya.
Ni oti tale ga e dua na macawa sara yaco mai na Mataivalu mai Suva mera mai tomani ira nodra i tokani vakaivalu e ra sa toka rawa e Talenavuruvuru.
Era mai tomani ira na vale ni volavola ni Yasana me tekivu mai vei Roko Tui Nadroga kei nona vaka i lesilesi ka vaka tale ga kina na Tabacakacaka ni Ovisa e Lawaqa.
Sa oti qo e tolu na vula, sa ra lesu tale nodra itokani mai na keba e Nabua.
Ia, nai lala nei Sajini Mejia Degei era se tomana tiko ga ena cakacaka ni veivakacokotaki ka ra vakarorogo vakadua tiko kina vale ni volavola ni Talai ena yasayasa vaka Ra.
Ena vula o Evereli kei na Me, oqo e rua na vula osooso ena kena wasei na kakana ena Yasana levu o Nadroga kei Navosa ka wili kina na vei mata tamata kece ka sega ni keda ga na i taukei, kuria o Degei.
Ia na kena tomani tiko na veiqaravi era sa na vakarorogo vakadua tiiko ga kina vale ni volavola mai Lautoka.