E RATOU sa cakacaka sara tiko vakaukauwa na timi ni Viti e na nodratou vakavinakataka na malumalumu e laurai tiko e na viriviri e na laini kei na caqecaqe ni bera tiko na nodrau sota kei na timi ni Toga e na rara mai Churchill Park e na Vakarauwai qo.
E vakaraitaka o Inoke Male ni ratou a vakatovolei mai vei Sikoteladi e na gauna ni laini ka ratou na bolei tiko kina ni bera na sota kei Toga.
E a rawati mai vei Sikoteladi e vica na viriviri e na laini ka daumaka sara na caqecaqe nei Ralulu e na Vakarauwai sa oti.
Io na caqecaqe kei na viriviri e na laini keitou na vakavinakataka ni bera na sota kei Toga. E a vakatovolei keitou sara ga o Sikoteladi ena laini. Keitou na laveta cake na neitou caqecaqe, e kaya o Male.
Ia, ena gauna qo e sa lade cake talega na i tutu ni timi ni Viti e na tuvatuva ni Matabose ni Rakavi e Vuravura (International Rugby Board) oya mai na i ka 15 ni tutu kina i ka 14.
E vakaraitaka tale ga o Male ni vinakata me na tosoya cake na i tutu nei Viti ka ni a lutu me laki dabe tiko e na i ka 16 ni tutu donuya na qito ni vuravura (Rugby World Cup) mai Niu Siladi e na yabaki sa oti.
Na neitou na qito kei na kena rawati na qaqa e bibi vei keitou mai na i tutu. Baleta ke rawa na qaqa e na qai rawa ni vinaka na i tutu, e kaya o Male.
Na jabeni ni vuravura e na buturara ni rakavi tinikalima oya na timi ni Niu Siladi e se vakadeitaki koya tiko e na i matai ni tutu ka tarava na timi ni Ositerelia, Sauca Aferika, Welesi, Igiladi, Argentina, Varanise kei Ailadi. E dabe tiko e na i ka 9 ni tutu na timi ni Samoa ka ni ratou sega ni druka ena sotasota ni Pacific Nations Cup kei Sikoteladi mai na i ka 11 kina i ka 10 ni tutu.
Na timi ni Toga, Itali kei Canada e ratou dabe tiko ena 11, 12 kei 13.