ERA a matanataka na lewe ni timi Viti na bole me i sosomi ni cibi me vaka era a dau vakayacora tu e liu na noda matatimi ni vanua e na gauna ni vakataki ni bera na veiqedravu kei Sikoteladi e na Chruchill Park e na Vakarauwai sa oti.
Levu sara na lomatarotaro mai vei ira na sarasara era osota na rara ni qito e na mua ni macawa sa oti se cava na vuna e sa mai veisau kina na Cibi ki na Bole me vaka era a rawata talega na qaqa e na valataki vanua e na Cibi.
Ia, e mani vakaraitaka o Manoa Rasigatale na turaga na vakatavulici iratou na lewe ni timi lewe tinikalima e na i bole vou oqo ni a laki raici iratou na Matabose ni Rakavi e na noda vanua.
Au gole ka laki vakaraitaka ni sa dodonu me bau veisau mada na cibi ki na bole.
E sega ni vakataki ira na noda toa ni vala ena gauna e liu e na nodra matanataka na cibi, era vakayacora mai yalodra dina.
Ia, nikua e sa vaka me matemate mai ka sa vakasaqarai e dua ka rawa ni vakaukauwataka cake na yalodra ni bera na valataki vanua, e kaya.
Tomana ka kaya ni donu vinaka tiko na vakayagataki vosa ruarua e na valataki vanua.
Na Cibi e kena i balebale ni sa rawa mai na i tavi era a talai kina na qaqa.
Ia, na Bole e kena i balebale nira bolebole mada e liu, oti mera qai laki valataka na nodra vanua.
Kevaka era sa qaqa mai sa qai mai caka na Cibi.
Kaya o Rasigatale ni kena e caka tiko e na gauna oqo era sa laki cibi sara tiko ni se bera tiko mada ga na valataki vanua.
E vakayacori ga e vica na veisau lalai e na vosa ni teivovo me rawa kina ni veisotari na matana kei na kena i vukivuki.
E vaka koto oqo:
AI TEIVOVO, TEIVOVO (L)
IO, IO, IO, IO (K)
TEIVOVO, TEIVOVO (L)
IO, IO, IO, IO (K)
RAI TU MAI, RAI TU MAI (K)
AU NAVIRI VIRI KEMU BAI (K)
IKO NA TOA YALEWA (K)
DARU VALA, VEICO, VEICO, VEICO (K)
AU TABU MOCE O I AU (K)
U MOCE GA E DOMO NI BIAU (K)
E LUVU KOTO KINA NOMU WAQA (K)
O KAYA BEKA U SA LUVU SARA? (K)
NOMU BAI WAWAMERE (K)
AU TOKIA GA KA TASERE (K)
TULETULE BUKA E SE DREDRE (K)
TULETULE BUKA E SE DREDRE (K)
IO, IO, IE (vaka tolu) (K)
Gadrevi me kilai: Na matanivola na L e kena i balebale o koyae liutaka na bole. Ia, na K aya o ira kece na kena vo.