SA kerei vakabibi oi kemuni na i taukei ni veisitoa e Viti raraba me kakua ni volitaki e dua na kakana ka vakacacani ena gauna ni waluvu ka tarai Viti ena tolu ki na va na vula sa oti.
E kauwai sara vakalevu na Matabose ni Dauvolivoli ni ka mai boko tu ena dua na gauna balavu na livaliva ena macawa sa oti ka dau kilai tu ni levu vei ira na i taukei ni sitoa e dau saga sara me volitaka taucoko na kakana ka vakacacani mai na waluvu.
Sa kerei vakabibi io kemuni na dauvolivoli mo ni kauwaitaka sara na voli kakana ena gauna oqo, taumada na kakana batabata.
E na levu sara na kakana volitaki tiko ka toqai me LUTU SOBU, ia sa kerei mo ni qai raica sara vakavinaka na i tuvaki ni kakana ko ni via volia.
Sa dodonu kina vei kemuni na lewenivanua na nomuni qaqarauni e na vuku ni tikina bibi oqo ka tiko vei kemuni na dodonu mo ni na vakaraitaka vakadodonu na tikina oya.
E tabu vakalawa na kena volitaki na kakana ka vakacacani ena gauna ni waluvu. Sa kerei io kemuni na i taukei ni sitoa mo ni yalomatua, ka mo ni raica me volitaki ga na kakana vinaka.
Na vakavinavinaka sa gole talega ki vei iratou na tabana ni kakana (Food Unit) mai na Valenivolavola ni Bula (Ministry of Health) ena nodratou mai raica na tabana oqo.
Sa kerei talega o kemuni na dauvolivoli mo ni soli tukutuku ki na tabana ni kakana ena talevoni 330 6177 se na Matabose ni Dauvolivoli ena talevoni 330 0792, kevaka ko raica se kila ni volitaki tiko eso na kakana ka mai vakacacani ena gauna ni waluvu.