ENA macawa sa oti eda raica tiko kina na bibi kei na noda dau vakamareqeta na noda i yau o i keda na i taukei.
Ia, ena macawa qo eda na vulica kina na kena dau vakayagataki na masi e na veisoqo vakaviti e na noda vanua.
Na masi Vakaviti e dau duatani ga na kena i rairai ni dau vakayagataki ena soqo. E dau vakayagataki na masi me i sulu ni vakamau, e vakayagataki tale ga me dela ni butubutu ni vakamau ka me rau na butu kina na veiwatini vou.
Na tevutevu e dau vakayagataki tale ga kina na masi oya na i yau ka kau ki na vale ni vakawati, oqori e okati kina na i vivivi ibe me tekivu mai na kena tabakau kina na dela ni loga, i coco levu, i coco lalai, na i kotokoto, na vakabati, na dela ni loga, na kumi, na gatu, na taunamu ni Viti, nai yaya vakavavalagi ka okati kina na taunamu, i tutuvi, na i latilati, yaya ni vale kei na vuqa tale.
E na gauna qo e sa dau dredre na noda raici ira na noda marama mera samu masi ka ni ra sa dau mai volivoli ga e na veisitoa e na noda veikorolevu ka vaka kina na vale ni vesu i yaya.
Na yanuyanu o Moce era kena dau e na samu masi ka matai sara e na kesakesa vakauasivi ni kena kesati na taunamu ni Viti, na masi lalai me i ukuuku ni vale na i sulu ni vakamau. Na yanuyanu talega o Vatulele e ra dau samu masi talega na kena marama.
Era dau kilai tani na noda veituraga bale ena noda vanua e na nodra dau vakayagataka na masi me nodrai sulu ka ni ra dau daramaka vakalevu na masi kuvui ka qai dau dua na kena i musu me dau cici vakababa e seredra ka dau vakatokai me wa bale.
E dau vakayagataki talega me i roqo ni gone e se qai sucu.
Na masi e caka mai na kuli ni kau.
Ia, ni cvavuti e na vosa vakavavalagi e kilai e na yaca na TAPA. E so na vanua e kilai e na yaca na KAPA me vakataki Tufi kei Awai.
Mai Toga Matanisiga e kilai levu e na yaca na GATU ka oqo e dua na i yau e dau vakayagatakai vakalevu e na veisoqo bibi ni vanua. Vei ira na wekada e Samoa e dau kilai e na yaca na SIAPO, kei Niue na HIAPO, e na yanuyanu o Pitcairn e dau vakatokai na AHI, ia, e kilai talega e na yaca na TAPIA. E Rotuma ea dau kilai vei ira e na yaca na UHA kei Viti e matata vinaka e na yaca na MASI.
Na veiyaca taucoko oqo e vakaibalebale ki na vanua e dewa mai kina. E na kena i tukutuku makawa e tukuni ni gauna era dewa tiko kina e na vakaqara vanua, e tauri rawa ni kau mai e na yaca na HIAPO se SIAPO mai na Ceva ni Tokalau kei Esia makawa.