E KENA i rairai ni sa na liutaka na Bose ni Koniferedi ni Lotu Wesele na kena Peresitedi o Talatala Ame Tugaue ena vula o Okosita.
E vakadeitaka mai na tikina oqo kina Nai Lalakai na i vukevuke ni Vunivola Levu o Talatala Tevita Nawadra. Na tikina oqo e mai laurai ni ratou a duidui kina na lotu kei na matanitu ena yabaki sa oti, ka qai soli tale mai kina ena siga sara ga ni bose ni sa vakadaroi tale na Bose ni Koniferedi.
E na nona veivakadeitaki kei na neitou laki veitalanoa kei Komisina ni Ovisa e vakaraitaka mai ni sa ciqoma talega na Paraiminisita ka veitokoni ena vuku ni kena sa na vakayacori tale na Koniferedi ni lotu, e kaya.
E vakaraitaka o Naivalurua ni veika e sa virikotori tu me baleta na kena vakayacori na bose ni Komiti ni Leqa ena vula oqo kei na vula o Jiulai e na vakatau kevaka e ratou sega ni voroka e dua na veiyalayalayalati na lewe ni Komiti ni Leqa. Na Komiti ni Leqa ena vakayacora tiko na nodratou bose ena vula oqo ena 29 ni siga ni vula oqo, ena siga Vakaraubuka e Suva.
Esa veivakadreti tale na matanitu kina lotu oya me kakua ni talanoataka e dua na ka me baleta na politiki.
E tabu saraga ni keitou na veitalanoataka e dua na ka me baleta na veika vakapolitiki, ka me na tikoga na veitalanoa me baleta na cicivaki ni lotu, e kaya o Talatala Nawadra.
Tukuna ni vakavinavinaka ni rau sa veitalanoa kei na Komisina ni Ovisa ena vuku ni kena sa dolavi na bose ni Koniferedi ni oti e va na yabaki.
E sa vakadonui talega na veika kece ena bosei ena gauna ni Koniferedi, ka sa soli mai na aua ni bose oya mai na 8 na kaloko ena mataka me yacova na 8 na kaloko ena yakavi, e kaya.
E kuria ni na sega ni na solia tale na Tabacakacaka ni Ovisa e dua na gauna kerei me na caka tale kina na bose, mera sa na cakacaka ga na lewe ni bose kei na veiliutaki mai na walu na mataka ki na walu e na yakavi. Esa biu tale tikoga ena veika e sa biuta mai na ovisa oya me na vakayacori tikoga na bose kece ena valenilotu levu e Suva ena Centenary.
Me na qai dau soli tiko na miniti ni bose kivei iratou na ovisa. Me na kua ni caka vata na bose ni Koniferedi kei na soqo levu ni Adi Senitoa. Vakaraitaka o Talatala Nawadra ni ratou sa marautaka na lotu na veika e sa veitokoni tiko mai kina na Tabacakacaka ni Ovisa.