KAYA ko Apakuki Kurusiga, na Manidia Liu ni Tabacakacaka ni i Taukei, ni dodonu ki vua e dua na Turaga ni koro me na yacova na i vakatagedegede duadua ni vinakati era e gadrevi, kevaka ena vinakati me na vakayagataki sara vakavinaka na veivuke mai na Matanitu me baleta na veivakatoroicaketaki ena taudaku ni koro lelevu.
E a vosa tiko o Kurusiga ena nodra dolava tiko na Bose ni Yasana o Tailevu ena macawa sa oti ka kaya ni oqo e dua na yavu bibi ni veisau ena Tabacakacaka ni i Taukei ena nodra yacova na turaga ni koro na i vakatagedegede e gadrevi ki vua e dua me taura na i tutu oqo.
E vakasalataki ira tale ga na lewe ni Matabose ni Yasana o Tailevu ni dodonu kivei ira na gadreva na veivakatoroicaketaki oqo mera muria na kena gaunisala dodonu.
Na gaunisala dodonu me muri e tekivutaki sara ga ena bose vakoro ka dau vakayacori kei na nona vola mai vakamatatata na turaga ni koro na veika e gadrevi kei na veika kece e vakadonui ena gauna ni bose vakoro.
Kuria ka vakaraitaka tale ga o Kurusiga ni sa tiko na vatavatairalago ena kena sagai me tara na nodra vale ni cakacaka na turaga ni koro kei na kena i yaya kece sara ni cakacaka ena gadrevi me rawa ni vakarawarawataka ka vakavinakataka na nodra cakacaka.
E vakatalega ni sa yaco tale tiko ga yani na kerekere mai na so na yasana ena kena gadrevi me tara na nodra vale ni cakacaka na turaga ni koro.
E kaya ni oya gona na vuna e gadrevi me na dikevi vakavinaka o koya me na taura na i tutu oqo ka me na yacova na i vakatagedegede e veiganiti vakauasivi ni dodonu me na laurai vinaka.
E vakaraitaka tale ga ni dodonu kivei ratou na lewe tolu na vukevuke ni Roko Tui ena veiyasana mera na qarava na dui tabana ni veivakatorocaketaki.
E dua me na qarava na vuli, e dua me na qarava na veivakatoroicaketaki raraba ka dua me qarava na veivakatoroicaketaki me baleta na nodra gagadre na lewe ni yasana.