NA kia kava ka vakayagataki e na nona valuti na mataivalu nei Ratu Cakobau e se tiko vinaka e na gauna qo mai Korovou e Wainimala.
E vakaraitaka o Iliesa Namado yabaki 44 na turaga ni Korovou e na yavusa o Vunaqumu ni nona maroroya tiko na kia kava oya e se solia sara vua na tamana lailai.
Na kia kava qo e a maroroya tu mai na tamaqu lailai, e kaya o Namado
Na tamaqu lailai e yacana o Joeli Varo ka se soli mai vua na kia kava qo, e kaya. Ni da raica na kia kava qo e sa makawa na kena i rairai, ia, e a dua vei ira na yaragi vakadomobula ka ra dau vakayagataka na qase e na gauna ni veivaluvaluti.
E vakaraitaka o Namado ni oya e dua vei ira na i vovo ni yaragi ka ra vakayagataka na nodra qase e na kena vakamalumalumutaki na mataivalu nei Ratu Cakobau.
Na kia kava e a vakayagataki e na gauna a kabai keitou mai kina o Ratu Cakobau kei na nona mataivalu, e kaya o Namado.
Ia, ena gauna qo e se maroroya vinaka tikoga o Namado na kia kava oya ka ni a maroroya mai na tamana lailai ka sa na maroroya tale tikoga o koya me i vakadinadina ni a dua na yaragi ka vakayagataki e na gauna ni valu i liu.
Na mataqali kia kava vata ga oqo e a vakayagataki e na kena votai na yagona na i talai ni Kalou, oya o talata Tomasi Peka e na nona kau lotu cake ki Navosa.
E tukuni ni a laumoku e na kia kava ka votai na yagona e na loma ni vanua mai vei ira na veituraga bale ena gauna oya ka ra vakayagataka me kedra.
Eda rawa ni tukuna e ke ni yaragi qo era dau vakayagataka ga vakatabakidua na noda qase ena kena ravuti na meca.