SA KOTO oqo e ra e dua na tikina ka dodonu me bau kilai toka vakavinaka sa i koya ni tolu (3) tiko na i tutu e caka tiko kina na veivagunuvi mai Bau, sa i koya na
1. Tui Kaba.
2. Vunivalu.
3. Liuliu kei Kubuna (solia na veivakaturagataki na Roko Tui Bau ena vukui Yavusa Ratu).
Ni sa caka na cabocabori e dau vaka oqo; Vakaturaga i Kubuna, vua na Turaga Tui Kaba, na Vunivalu.
Veiqaravi vakavanua bibi (Ceremonial Signifiance)
1. Tui Kaba - Lai sili e nai silisili mai Kaba ni oti na veibuli. (Sema kei na i katolu (3) ni talanoa ni Yavusa Kubuna mai vei Ratu Isoa Natuituba me baleta na kawa ni qaqa ena veitaucici mai Walu kei na vakavunene ni nona lako tani mai Kaba mai vei ira na vo ni makubui Rokomautu)
2. Vunivalu - Veibuli e Bau (Sema kena i karua (2) ni talanoa ni Yavusa Kubuna mai vei Ratu Isoa Natuituba me baleta na kawa mai vei Nadurucoko kei na nona gole cake mai ni oti na nona vakamatei Vakatobai mai Navakawaluwalu e Nabukadra)
3. Liuliu kei Kubuna-(Sema kei na i matai (1) ni talanoa ni Yavusa Kubuna mai vei Ratu Isoa Natuituba me baleta na kawa e sema mai vei Vueti na makubui Buisavulu na ulumatua yalewa nei Lutunasobasoba)
Moce bogi dua (1) e Vatanitawake na kawa ni ulumatua nei Vueti mai vei Adi Kulanawa (Tinai Raivolita) ka kune kina na vuvale e vale (Malani) ka qai vakaisulutaki mai vei ira na marama Yavusa Ratu mai Kavula ka qai gole i Mataiwelagi me lai kauti koya sa buli me Vunivalu ka solia vua na sau ni ulumatua ka lai vakadaberi koya ena vatuniloa ni veibuli.
E na 1959, e a cakava na i tavi oqori o Roko Malani na ganei Adi Laufitu Malani (Minisita e liu) ka ra ukucavu ka vakaisulutaki koya na marama Yavusa Ratu mai Kavula, dina ni keitou sa vaka Mataqali tu i Burelevu.
E levu e ra raica tiko mai na ka e a caka oqori me baleta na yasana ni Gonesau mai Ra se yasana ni Tamai Raivolita (Vunivalu ka tama vata kei na kawa nei Vunivalu Nailatikau) ia e ra sega ni kila na kena i balebale dina se significance ni veivakadaberi oya sai koya nai katolu ni tutu mai vei Vueti ka vu mai kina na Ulumatua, o tinai Raivolita, Adi Kulanawa mai Verata.
O Roko Tui Bau baleta ni sa sega ni kena kawa dina ni Roko Tui Bau (ia e kawa ni gone ni Vunivalu, Tui Kaba) e sa qai dau lai solia ga na bilo ni veivagunuvi ena vatuniloa, ka keitou sa na sega ni tiko i loma baleta ni na sega ni rawa ni caka na veivagunuvi ni keitou tiko e loma. Ena 1959, o Roko Malani e vakadabera ga vunivalu e gole tale mai Vatanitawake.
Na bosebose ni veibuli e na gauna qo mai Bau e sa vakabi tikoga ena i tutu ni Tui Kaba kei na Vunivalu ka ra sa via lewa tikoga mai Bau kei na Matanitu o Bau kei na Bose ni Yasana o Tailevu.
E sa sega beka ni matata vinaka vei ira na veika me baleta na i liuliu kei Kubuna kei na bibi ni veiyagani vakaveiwekani.
E levu na ripoti ena pepa e ra sega ni kila vinaka tiko na kena matailalai ka ra tukuna tiko ni o koya ga sa Vunivalu, Tui Kaba e sa turaga levu ka naba dua e Viti. E sega ni o koya taucoko o ya.
E na sega ni o koya taucoko oya kevaka e sega ni solia yani vakavanua na i ka tolu ni tutu ni sai koya me sa Liuliu kei Kubuna talega ena qai rawa ni tukuni kina ni sa turaga levu e Viti.