ERA marau na lewenivanua e na tikina o Noemalo e na kena sa mai tawani tale na i tikotiko ni nasi e Narokorokoyawa.
E dua dina na gauna balavu na nodra waraka tiko na lewenivanua e na ulu ni wai na Wainimala e na kena mai vakaisosomitaki na nasi ka veiqaravi tiko e na valeniwai e Narokorokoyawa. Ia, e na gauna qo e sa lesi yani kina e dua na nasi me laki veiqaravi kina.
E vakaraitaka o Alivereti Qiolele e dua na turaga e Korovou e Wainimala e na nodra sa qai vakacegu e na vuku ni kena sa yaco yani na nasi kina nodra vanua.
Sa dua na ka na neimami marau na kena sa mai tawani tale na i tikotiko ni nasi, e kaya o Qiolele.
E liu e na gauna e lala tu kina na i tikotiko ni nasi, e ra sa dau oca na neimami tinani gone na taubale ki Laselevu e na nodra dau laki raici, e kaya o Qiolele.
Ia, e na gauna qo keimami sa kalougata sara vakalevu.
E vakavinavinaka sara vakalevu o Qiolele ki na Tabana ni Bula kei na kena valenivolavola ni yasana e na kena rogoci na nodra tagi e na vuku ni veiqaravi ni tabana ni bula.
Sa dua na ka na neimami vakavinavinaka kina Tabana ni bula e na kena rawa me soli tale mai e dua na nasi me mai veiqaravi vei keitou naloma ni tikina qo, e kaya o Qiolele.
Vei ira na tauvimate bibi era sa dau vakauti sara ki Vunidawa se dewa sara yani vaka ki Nausori se ki Suva sara.