E vakaraitaka na timi ni Tailevu ena macawa sa oti e dua tale na i walewale ni qito ka dodonu mera na kua ni taura vakamama na vo ni veitimi. Na timi ni Tailevu e vakadrukai Nadroga ena kai 15 kei 14 e na rara na Ratu Cakobau park.
E da kila vinaka ni timi ni Nadroga e timi kaukauwa ka timi jabeni tiko ni rakavi tinikalima ena noda vanua ka ni taura ruarua tiko na i covi ni qito rakavi oya na Digicel Cup kei na Farebrother. Ia e vakaraitaka na dauniveivakatavulici ni timi ni Naitasiri o Talatala Joji Rinakama ni ratou qito vinaka na timi ni Nadroga ia e ratou qito vinaka sara na timi ni Tailevu.
E qito vinaka o Nadroga, ia, o Tailevu e taucoko sara na nodratou qito vinaka, e kaya o Rinakama.
Ia na timi ni Tailevu e ratou kalougata e na vava nei Jaoji Dakuvula e na nona caqeta rawa na veitotogi ka soli vei ratou ka vakavuna kina me ratou qaqa e na Vakarauwai sa oti. Ia e kaya o Rinakama na nona mai vakadrukai Nadroga na timi ni Tailevu esa dodonu kina me ra na kua ni taura vakamama na vo ni veitimi na nona qaqa oya.
E dodonu me ra kua ni taura vakamama na vo ni timi na nona sa mai qaqa qo o Tailevu, e kaya o Rinakama.
Ia na timi ni Naitasiri e rau na qai sota sara tiko kei na timi ni Tailevu e na i otioti ni cawiri ni sotasota ni Digicel Cup. Na kai kei Nadroga e rawa mai na nona tabaka e dua na sikoa o Rupeni Nasiga kei na nona caqecaqe e matamata o Ratunaisa Vatuinaruku. Na nona qaqa qo o Tailevu e sa mai liu kina e na 30 na poidi ka rau karua na timi ni Tailevu kei Naitasiri ena 26 na poidi e na sotasota ni Digicel Cup.
Ia e na macawa tolu mai qo e na cegu tiko kina na sotasota ni Digicel Cup ka ni na vakanamata tiko na noda vanua e na sotasota ni Pacific nations Cup k avakayacori tiko mai Japani, na nodra sotasota na marama e na lewe ya vitu ka na vakayacori tiko mai Lautoka kei na sotasota ni Juniro World Championship ka vakayacori tiko mai Sauca Aferika. E vakaraitaka o Vilikesa Rinavuka na vakalesilesi ni rakavi unioni e na noda vanua ni na qai vakayacori tale tiko na sotasota ni Digicel Cup e na i ka 29 kina 30 ni Jiune.