E A vakayacori mai na loma ni yasana o Ba e na macawa qo na nodra vuli na veimata mai na veitikina e na loma ni yasana.
Na vuli qo e ratou a vakarautaka na matabose ni qele maroroi e na kena gadrevi me ra na vakadeitaki na lewenivanua e na veiwekani e tiko mai na Matabose ni
Qele Maroroi kei ira na i taukei ni qele.
E vakayacori na vuli oqo e na Civic Hall mai Ba.
Na ulutaga ga e veivosakitaki tiko e na vuli qo oya na kena vakaqaqacotaki na veiwekani ni kena rawa na tubu vaka i lavo kei na veivakatorocaketaki mai vei ira na i taukei ni qele kei na matabose ni qele maroroi.
Oya e tiki ni nodratou i tuvatuva na matabose ni qele maroroi me vakatekivu mai na 2012 kina 2014. Oya talega e tiki tiko ni gagadre levu e na noda vakarautaki ka vakayaloqaqataki na lewenivanua e Viti kei na sasaga ni bula vakailavo e na gauna qo.
Na ciwa na Tikina era vakaitavi tiko ena vuli qo, oya na tikina o Bulu, Nailaga, Tavua, Savatu, Qaliyalatina, Nadrau, Naloto, Nalotawa kei Magodro.
Era tiko rawa e rauta nira lewe 200 na i taukei ni qele oya o ira na turaga i taukei, turaga ni yavusa, turaga ni mataqlai ka vaka kina o ira na lewe ni mataqali.
E tiki talega ni vuli qo na nodra laurai na i taukei ni qele e na nodra vakaitavi e na veivakatorocaketaki ni noda vanua.
E soli talega na gauna vei ira na i taukei ni qele me ra na vakaraitaka kina na nodra gagadre kei na veika e ra vinakata na lewenivanua e na nodra vekorokoro e na loma ni tikina e na yasana o Ba.
E nuitaki talega ni na cava na vuli oqo e sa na veivuke vei ira na lewenivanua i taukei ni qele na nodra kila na veika e cakacakataki tiko mai na tabana ni qele maroroi, na i naki ni qele maroroi, ka vaka kina na tuvatuva ni qele maroroi.
Na veika e sa rawata na qele maroroi. Na wiliwili ni qele e lisitaki ka vaka kina na kena tubu na wiliwili ni qele e lisitaki ka vakaitavi tiko kina na matabose ni qele maroroi.
Na i lavo e kumuna na Matabose ni Qele Maroroi e na veiyabaki kei na i lavo e vagolei i tuba e na veiyabaki. Na i tuvatuva talega me baleta na qele ni taukei e na kena qarauni ka raici vakamatau mai na matabose.