ERA sa qai lesu mai Treasure Island enanoa na Gone Turaga na Tui Vuda, Ratu Eparama Kitione Tavaiqia, 83, e na nodra laki sisili kina me vaka na kena i vakarau vakavanua e Vuda ni oti na nodra vakamau kei Adi Senitiki Lewatuninamoli Nava, yabaki 63, e Viseisei e na Vakaraubuka sa oti.
Era a osota yani na veiwekani vakadra, vakavanua kei na i tokani na nodra vakamau na Gone turaga na i Taukei kei Vunisei.
E kaya o Nemani Driu, yabaki 60, mai vei iratou e Naburenivalu ni oqori e dua na siga lagilagi e Vuda vakabibi ni sa qai oti koto ga e dua na yabaki na nodra vagunuvi ki na i tutu vaka Tui Vuda.
E mai vakayacori e dua na yaqona kei na i waraki e na nodrau lesu mai na Turaga na Tui Vuda kei na Radini ni Vanua, e kaya.
Ia, e na mai vakayacori talega e dua na i vakavinavinaka ki na i Tokatoka o Nakelo e na kena qaravi na veitube ni vakamau.
Kaya o Driu ni oqo e sa i ka va ni watidra na Tui Vuda ka ra raica na vanua ni na veiyagani sara vakalevu e na veitomani e na vuku ni tavi era qarava na turaga.
Era osota yani na soqo lagilagi oqo na veiwekani e Viseisei, Namoli me vaka e marama ni Vidilo e Namoli o Adi Senitiki kei ira mai Waya Levu, e na vanua era vasu kina o Ratu Eparama.
Ko Adi Senitiki e luvedrau o Wainikiti Munadra e Lawaki kei Ratu Joji Nava e Namoli.
Era bau osota talega yani na veimata-tamata na loma ni koro vakaturaga oqo mera vakadinadinataka na soqo bibi oqo.
Era a sa dawai voli na Gone Turaga na Tui Vuda e na nodratou sa vakacegu yani na tolu na nodra vakamau ka ra marama ni Viseisei.
Ratou lewe ono kece na veitacini e Vale Levu ka gone taudua o Ratu Eparama. E tacidrau na Gone turaga na Tui Vuda sa bale o Ratu Josaia Tavaiqia, Ratu Josefa Iloilovatu kei na vica na ganedratou. E turaga nodratou i tubutubu o Ratu Josaia Tavai.
Ko Ratu Josaia oqo e dua vei ira na gone mai vua na Momo Levu Nasorowale Nayacalevu, Momo na Tui Ra ka ra a ciqoma na Lotu e na 1835 mai Mereke me baleta na vanua o Vuda. E osodrigi na loma ni valenilotu na Jone Wesele e Viseisei vei ira na mata veiwekani e na lotu ni vakamau. Ni oti na lotu e a vakayacori na solevu e na loma ni rara levu e Viseisei ni bera ni qai vakayacori na vakayakavi kei na kena soqo vakavavalagi.