ESA na vakayagataki tiko na tikidua ni vakatakilakila se na identification cards ena veidigidigi ni 2014.
E kaya na Vunilawa o Aiyaz Sayed-Khaiyum ni oqo e kena i matai ni gauna me na vakayagataki kina na tikidua ni vakatakilakila mai vei ira na veidigidigi ka me na vakalailaitaka na leqa e dau sotavi e na gauna ni veidigidigi.
E kuria talega o Khaiyum ni sa vakarautaki oti tu e sivia ni 1,000 na vanua me na vakayacori kina na vola yaca me baleta na veidigidigi e na veiyasai Viti ka ra na gole tiko yani kina na kena i vakalesilesi mera na veivotayaka na tikidua ni vakatakilakila oqo e na gauna ni vola yaca. E vakaraitaka tale ga ni oqo e i matai ni cavu i kalawa ki na noda vakavakarau kina i walewale ni veidigidigi vou ka na taurivaki tiko e na yabaki 2014 ka nuitaki ni na veivuke vakalevu vei keda na lewenivanua vakauasivi e na noda veikorkoro kei na veivanua mai na taudaku ni veikoro levu.
E kuria tale ga e na nona i vakamacala o Khaiyum ni na qai vakaraitaki raraba tiko yani vei keda na lewenivanua na veika e so meda na kauta tiko mai e na gauna ni vola yaca me vaka na i vola ni sucu, i vola tara ni curu vanua (passports) me i vakadei ni keda i vakadinadina, ka na qai rejisita taki na keda i tukutuku ka qai soli na noda tikidua ni vakatakilakila (id cards) me baleta na gauna ni veidigidigi.
Ena tekivutaki tiko na vola yaca e na i ka tolu ni siga ni vula o Jiulai ka na liutaka tiko na noda Paraiminisita me na kena i matai me na taura na nona tikidua ni vola yaca.
Na vola yaca oqo e na vakayacori tiko e na loma ni walu na macawa e na kena vanua vakarautaki e na veiyasai Viti.
E namaki tale tiko ga mera na rejisita e sivia ni 640,000 na lewenivanua me baleta na veidigidigi ni yabaki 2014.