A levu era sa volavola cake tiko ena vuku i Kubuna ka ra sa tekivu cauraka na veitukutuku makawa era kila, me vaka e vakaraitaka o Jovilisi Kedrayate, yabaki 83 mai Naimasimasi, Vugalei, Tailevu.
E sa tataunaka na turaga oqo vei kemuni kece na volavola tiko ena i ulutaga oqo me baleti Kubuna, au sa kerea mo ni sa dabe dei toka ena tolu na yavu bibi oqo.
Na kena i matai na Dina, na kena i karua na Dodonu kei na kena i katolu na Savasava. Oqo na yavu va-Kalou. Na yavu talega oqo e sa cicivaki keda tiko kina na lewe i Viti nikua na matanitu, e kaya.
Au kerea saka meu tarogi kemuni na vakamacala tiko ena vuku i Kubuna. E tiko vei kemuni e so na i Vola Tukutuku makawa? Se o ni tauri tukutuku tiko ga mai vei ira eso na dau so kumuni i tukutuku mai na bati ni tanoa?
Meu vakaraitaka mada na ka e vola na noqu mataqali mai Nakorotubu, o Jone Vatuwaliwali ena i Lalakai ni Lotulevu 3 ni Me, 2012, e kaya va qo, keitou sa vosa tiko yani oqo ena kaukauwa kei Viti. E tiko vei keitou oqo e dua na i vola mai vua na Marama Bale na Ranadi kei Peritania vei Tukai keitou ka vaka koto oqo ni mai tinia na nona i vola vakarisiyate: Elizabeth II, Yours obedient servant .E sega mada ni vakaraitaka se cava na lewe ni i vola. Io, vei au na nona i tukutuku koya e vosa tiko kina me baleti Kubuna e vakayavu - oya na ka e vinakati.
Kuria ka kaya vaka oqo ne; Era dau kaya ga vaka oqo na buinigone ni Vugalei, Kua na vosa yabone. E ratou na qai vakamacalataka na neitou Naita mai Nasautoka na i balebale ni vosa Yabone. Tomana ka kaya ni tiko eso na i vakadinadina ni veika o kila me baleti Kubuna.
Me vaka au sa kaya toka mai cake, ni o ni vosa se volavola, me dabe ena kena yavu e tolu - Dina, Dodonu kei na Savasava.
Au laveta cake tiko na yavu e tolu oqo ni yavutaki e na i Vola Tabu. Ia, Na i Vola Tabu ni Vu ni rarama levu, mai vua na Kalou, vei ira na parofita kivei keda na tamata.
Me kua ni dua na tamata me vakamacala mai na ka ga e kila se na ka e rogoca se vulica.
Me dabe e na vosa ni Kalou (Same 119: 160) Sa ka dina mai liu sara na nomuni vosa: Ka sa sega ni mudu rawa e dua na nomuni lewa dodonu. E na tikina e 130, Ni sa vakamacalataki na nomuni vosa sa qai rarama mai. Sa vakavukui kina ko ira era sa sega ni vuku. Kaya o koya ni sa dua na gauna dredre eda sa donuya cake tiko oqo na kawa i Taukei ena vuku ni i tukutuku makawa era sa tekivu vsksmscsls tiko mai kina e vuqa mai na veiyasai Viti e so.
Tomana ka kaya ni sega ni ca oya, ka na sega sara talega ni tarovi rawa, ni sa kena gauna.
Esa tekivu me basuraka sobu na veika eda vakamareqeta na i Taukei - na veirogorogoci, na veirokorokovi, na veivakaliuci. Ia sa dina sara!
Eda sa mua donu tiko li? Eda sa mua tiko ki vei,? e taroga.
Na i Vola Tabu duadua ga ena sauma vakadodonu na veitaro oqori.
Ni kaya vei Aisea na nona parofita me vakaraitaka na vu ni leqa oqo - Aisea 1: 2, Dou rogoca, na lomalagi, ka vakatudaliga na vuravura, ni sa kaya mai ko Jiova, Kau a susuga ka vakalevulevui ira na luvequ, ia ko ira, era sa vuki tani mai vei au. Sa kila na kedra i taukei na manumanu, ia ko ira na noqu tamata era sa sega ni kilai au, se nanumi au.
E kaya o Kedrayate ni i tukutuku oqo me vagolei vei keda na i Taukei ni vanua oqo. Ni wilika sobu na vei tikina me yacova na tikina e 31.
Na tikina au rui taleitaka oya na tikina e 18, e kaya, Dou mada mai me tou veivosaki vata, sa kaya ko Jiova; ke sa vaka na ka kulakula na nomudou i valavala ca, sa na vulavula me vaka na uca-vulavula; ke sa damuvakula sa na vaka na vutika ni sipi. Kevaka dou vakadinata ka vakarorogo, dou na kania na veta ni vuata.
Ia, kevaka dou sa bese ka talaidredre, ena kani kemudou na i seleiwau: ni sa tukuna oqo na gusu i Jiova.
Esa gadrevi me vakadodonutaki na noda i tikotiko ni veiliutaki vakavanua na i Taukei. Me da veibulubuluti vakavanua, me muri na gaunisala vaka i Vola Tabu. Me caka na veivakatusai, me ra veituberi kina na i talatala ni veilotu va-Karisito kece sara era sa tiko e Viti e daidai ka mera veitokoni kina na veituraga kei na veimarama bale ni noda veimatanitu vanua, o ira eda kilai ira vakavinaka tu. Ia, kevaka eda na vakadidivarataki keda ena veika kece oqo, meda kua ni kidacala ena veivatonaki sa vakaraitaka vakamatata tu na Kalou vei Aisea na Parofita ena i Vola Tabu (Raica na Aisea 3: 1-10).
Eda sa bula donuya tiko na i vakataotioti ni gauna vaka i Vola Tabu. Meda veivuketaka kece na soli vakasama ena veika vakayago kei na vakayalo me da toso kina ki liu ena veilomalomani e na yavu oqo na Dina , Dodonu kei na Savasava - o koya e sa vakamuai , ka tosoi keda tiko kina oqo ki liu a matanitu nei Bainimarama e daidai. Tinia ka kaya ni sa kerei kemuni na i Talatala ni vei lotu va-Karisito e Viti e daidai, mo ni kua ni galu tiko, mo ni veivakasalataki tiko ena veika ga e dodonu.
Ia, ke sega, ni raica na i tukutuku sa vola na Parofita ko Isikeli 33: 1-8, Na i tukutuku oqo mo ni vagolea kina kina na nomuni vakasama. Ia, ke sega, na neimami mate ena tarogi vei kemuni. Ena nomuni sa galu tiko na i talatala, sa vakayagataka na Kalou e so me ra vosa vakadodonu e na vukumuni.