ENA macawa sa oti eda wilika kina na kedrai vakamacala na marama lotu Islam ena vuku ni kena maroroi na savasava ni Kalou ka levu era sa tacori tu kina ena gauna nikua ena mataqali sulusulu, au rawa ni kaya eke, vinaka cake me sa kua ga ni dua na ka e tokari.
Na cagi ni veisau vaka-demokarisi sa liwavi vuravura tu nikua, sa rawa talega nida kaya - walega qo da luvawale wavoki me vakataki rau na vuda o Ivi kei Atama, ni bera ni rau kania na vuanikau ni kila na dina mai na ca.
Levu na mataqali sulusulu sa caka tu nikua ena noda vuravura, sa rauta me levu cake tikoga mai na kucu, na modro gone, na vesu yalewa kei na bukete dole.
Nikua o Viti sa kama tale tikoga ena bukawaqa vaka-galala ni digidigi vakamatatamata (Human Rights) sa mai vakavulici ira vakaca na luveda goneyalewa kei ira na watida ena so na mataqali sulusulu ka sega ga ni dodonu me tokari enai matai ni gauna nira mai ciqoma na lotu o ira noda qase.
Na lotu Vakarisito e vakaisulutaki ira noda qase, ka sa tekivu mera vakaisulu ena vakarokoroko kei na veidokai ka vakadavora rawa tu e dua na kawakawa vou meda muria nira sa vakasinaiti ena vosa ni Kalou nisa mai cilava na mata ni yalodra na rarama ni Kalou bula ena nodra wilika ka vakavulici ena Wilivola ni Siga Tabu ena veimataka ni Siga Tabu mai vei ira na Misionari.
Nai Vakarua wase 22:5 e kaya kina na Kalou vei ira na Isireli ni sa sega ni dodonu mera tokara nai sulu ni tagane na yalewa, ka sega talega ni vinaka mera tokara nai sulu ni yalewa na tagane.
Nikua eda sa sarava tiko e dua nai yaloyalo vou ka veibasai sara vakalevu kei na ka e kaya Nai Vakarua 22:5, sa ra dara tiko na noda marama nai sulu ni tagane (lesbian), ka ra tokara tiko na vinivo na tagane (gay).
Na lotu Islam e vakatabua sara ena kenai vakatagedegede duadua e cake na mataqali vakarau vakasisila vakaoqo - sa rawa nira labati se laulauviri ena vatu me yacova na mate o ira na gonetagane era kunei nira dara tiko nai sulu ni yalewa, veitalia sara mada ga era vakasalewalewa tu na nodrai vakarau ni bula.
E vakakina vei ira na nodra goneyalewa - sa vinaka cake mera vakamatei ka ca mera vakaboicataka na nodrai tikotiko se vakacacana na yaca ni lotu vakauasivi ena kena vakadukari na valetabu (tabernacle) ni Kalou.
Kaya o Paula vei Timoci: Dou sa sega beka ni kila ni dou sa vale ni Kalou (temples of God) ka sa tiko vata kei kemudou na yalo ni Kalou (Holy Ghost)?
Oqo na vuna era vakatabuya kina na lotu Islam nai sulusulu vaka-ca.
Se mera tokara nai sulu ni tagane na yalewa se vakavinivo na tagane.
Ia, ena macawa sa oti eda sarava talega kina e dua nai yaloyalo ni marama lotu Islam nira ubi taucoko tu enai sulu loaloa.
Meda raica sara mada vakavinaka nai yaloyalo oqori: e vica na ka eda raica kina:
Dua - na roka ni vinivo e ratou tokara tiko, e loaloa, baleta mera vakaraitaka na vakarokoroko me vaka era kitaka noda marama nira vakaloloku vua e dua na turaga sa bale.
Rua - na vakaciri galala ni vinivo e ratou tokara tiko, oqo me kua ni laurai nai bulibuli ni yagodra, vakabibi na sucu, na mata ni sulu kei na dakuna, baleta me kua ni dreta na matadra na tagane nira rai yani.
Kaya o Jisu, ni sa raica e dua na tagane e dua na yalewa ka sa dodomo kina, e sa veibutakoci rawa e lomana (sa vakacalai rawa).
O ira na marama lotu Islam era dau qarauna me kua ni mokota na tolodra na vinivo era tokara.
Oqo era tekivu vakavulici saraga mai nira se goneyalewa lalai, mera dau vakaisulu ena yalo vakarokoroko.
Na nodra vinivo me balabalavu vinaka ka yaco sara ki na durudra, na liga ni vinivo me yaco sara ki na nodra labi ni ika.
Ke ra vakatarausese ni yalewa (salwar kameez) ia me balavu vinaka me ubia talega na vanua e curu kina nai vava ka me vakaciri galala me kua ni laurai levu tu nai bulibuli ni temona, se sagana, vakabibi na daku ni yagona tabu kei na matana ni nona tarausese.
Na vakatarausese lekaleka (shorts) e tabu sara vei ira, baleta oqori e vakavotuya na yagona vei ira na tagane ka vaka kina na siqeleti tabaleka se T-Shirt baleta ni nodra ga na tagane na mataqali sulusulu oqori.
Tabu talega mera tokara na vinivo tabaleka (sleeve-less) baleta ni vakavotuya nai rairai ni ligadra volekata na sucudra ka dau coba rawarawa kina na mata ni tagane.
Bau raica se rogoca me bukete dole e dua nodra goneyalewa?
Sa bau wadrega.
Bau raica se rogoca me dua e soli koya vakarawarawa vua e dua na tagane ni bera ni vakamau? Tabu tabu sara.
Oqori baleta nira okata na veika e volai ena nodrai Vola Tabu na Quran me VOSA DINA ni Kalou.