E RATOU mai cakacaka nodratou na timi jabeni ni Nadera Panthers e na nodratou vakadruka na timi ni Suva Titans e na kai 64 kei saiva. Na timi ni Panthers e taura tiko na i covi ni qito rakavi saumi mai na yabaki sa oti oya na Vodafone Cup.
E se qai matai ni gauna vei ratou na timi ni Titans e na nodratou vakaitavi e na wasewase na premier. E sa qai dua na veisivi levu ena nodratou sega ni taqea rawa na timi ni Titans na kaukauwa ni qito e ratou vakayacora na timi ni Panthers.
Na timi o rau qo e rau a sota tiko e na sotasota ni Nasinu zone ka vakayacori ena rara na Bidesi park ka ni sega ni dua na rara ena yasayasa vaka-Nasinu me galala tiko.
Ia, e vakadeitaka o Sale Tubuna na vakalesilesi ni rakavi saumi e na noda vanua ni na tokitaki tale na sotasota ni Nasinu zone e na rara mai Nasinu e na macawa qo.
E dodonu me ratou (timi e vakaitavi e na Nasinu zone) na qito e na macawa sa oti, ka mani keitou vaakdaroya ni sega ni dua na rara e galala tiko mai Nasinu, e kaya o Tubuna.
Ia, me vaka ni ru ana rara e tiko i ke (suva zone) a mani vakayacori na sotasota ni Suva zone e na Buckhurst Park ka soli kina vei Nasinu me ratou tekivuna na nodratou sotasota e na Bidesi park, e kaya.
E sa karua ni rauni qo vei Suva ka matai vei Nasinu.
Na vo ni timi ka ra vakaitavi tiko e na sotasota ni Nasinu zone oya na timi ni Narere Tigers, Davuilevu Knights, Makoi Bulldogs, Kinoya Sea Eagles kei na Nakasi Cowboys.
E vinaka ni ratou sa tekivuna rawa na nodratou sotasota na Nasinu zone.
E na macawa qo esa na macala kina na nodratou rara, e na rairai ratou na vakayagataka na rara ni Ready Action Unit (RAU) mai Makoi.
E na vinaka talega vei ratou me na vakalesui tale na nodratou sotasota e na nodra yasayasa ka me na rawarawa kina vei ira na dauniveitokoni kei ira na veitimi na nodra mai tiko e na gauna ni qito kei na nodra lesu tale..