Update: 2:04PM E tataunaka vakabibi na turaga Peresitedi ni noda vanua o Ratu Epeli Nailatikau na kena vakarautaki na qito ni vuravura e na 2015 e sa na tekivutaki na kena vakavakarau e na macawa mai qo e na qito mai Japani.
Oya na nona vakadeitaki ratou na lew ni timi ni Viti kina rakavi tinikalima e na sotasota ni Pacific Nations Cup ka na vakayacori mai Japani.
Na nodratou na biubiu tiko e na Vakaraubuka qo na timi ni Viti esa vakabibitaka na Peresitedi na i tavi e na kena lai vakayacori na qito.
E na macawa sa oti e ratou mai tatau na timi ni yabaki 20, kau vakadeitaka vei ira ni oqo na i matai ni kalawa kina sotasota ni rakavi vuravura e na yabaki 2015, e kaya.
Ia vei kemudou na vakavakarau ni rakavi ni vuravura e sa tekivutaki oti, ka sa na tu na veimasulaki mai na vanua mo dou na rawata na qaqa, e kaya na turaga Peresitedi.
Dou sa vakayacora oti na nomudou vakaukauwa yago, ka keimami sa kila na veika o ni lako curuma, ka keimami marau e na vukumuni, e kaya o Ratu Epeli Nailatikau.
Dou kalougata e na nomudou qito ka kauta lesu mai na qaqa kina noda vanua, e kaya.
Na timi ni Viti e rau na doladola tiko kei Japani ka rau na sota tarava kei Samoa ni bera ni rau qai mai sota kei na timi ni Toga ena noda vanua ka vaka kina na timi ni Sikoteladi.
Nuitaki ni ratou na laki vakaraitaka na noda cauravou na qitoqito ka dau kilai tani kina o Viti. E sa koto oqo e ra na yacadratou na lewe ni timi.
Kelemedi Bola, Aloisio Butonidualevu, Graham Dewes, Vereniki Goneva, Aisake Katonibau, Kelevi Ketedromo, Isimeli Koniferedi, Benedito Koroi, Setareki Koroilagilagi, Nikola Matawalu, Apisai Naikatini, Waisea Daveta, Leone Nakarawa, Seremaia Naureure, Nemia Kenatale, Iliesa Ratuva, Mala Ravulo, Setefano Somoca, Netani Talei (kavetani), Viliame Veikoso, Samu Bola, Watisoni Votu, Waisea Nayacalevu, Jerry Yanuyanutawa.