SA dua tale na cavuikalawa e sa vakayacora na cauravou momoqaqa i Taukei o Mosese Sorovi me sa na veivacutaka na beleti ni World Boxing Association PBA ka na vakayacori mai Melbourne e na i ka 13 ni Jiulai ni yabaki oqo.
E na nona vosa tiko mai na nona i tikotiko mai Cambeltown, Serene, Ositerelia e kaya o koya ni rau na sota kei kei Blake Caparello, na tagane ka a vakadrukai Joseph Kwadjo e na yabaki oqo e na i vakatagedegede na super middleweight.
Ia, na tagane oqo o Caparello, yabaki 25 ka se bera ni druka vakadua e na 13 na nona veivacu taucoko ka qaqa taucoko e na poidi, e qito tiko e na i vakatagedegede na light heavyweight.
Keirau na mai veiacu e na i vakatagedegede na cruiserweight oqo e na neirau na veivacutaka na beleti oqo, e vakadeitaka o Sorovi e na bogi Tusiti e na talevoni.
A se qai rawata ga o Sorovi na beleti ni cruiserweight ni International Boxing Federation Pan Pacifc e na i ka 28 ni Epereli ni yabaki oqo e na nona vakadrukai Pieter Cronje e nai ka ono ni wavoki.
Ia, e na yabaki sa oti a rawata talega o koya na beleti ni World Boxing Foundation Inter-continental cruiserweight. Kuria ka kaya o Sorovi ni sa vakaraitaka ki vua o Jeff Malcolm ka vakarautaka tiko na veivacu oqo me na vakavakarau vakavinaka yani ki na veivacu oqori.
Kaya o koya ni kevaka au na qaqa e na neirau veivacu oqo e sa na vakarautaka meu na veivacutaka e dua na beleti ka tiko e na ruku ni soqosoqo na World Boxing Council e na Okotova ka me na vakayacori mai Perth.
E sa na rawarawa sara vei au oqori meu na ladeva cake yani na i vakatagedegede ni vuravura meu na saga na beleti ni dua vei iratou na i soqosoqo oqo na WBA, WBC se IBF, e kaya.
Ia, ena Sepiteba e rau na calidi tale kei Cronje me rau na veivacutaka na beleti ni IBF Pan Pacific.
E liu au a sega ni vakarau vakavinaka ka walu vakawalu o revari e na i ka tou, ni waovki e na nona voleka ni rawati au.
Au taura toka vakamalua, kau qai laki vakalutumi koya vakatolu e n ai ka ono ni weavok ini berta ni tarova o revari. Ia, na i karua ni sota oqo e sa na lekaleka sara na qito niu sa na vakarau yani vakavinaka, kaya o Sorovi.
Dau kilai tu o Sorovi ni tagane ni Matanuku, Kadavu, ia, na kena dina ni tagane ni Nukutubu ka dua na kawa ni mataisau. E sa veivacu oti vaka 39 ka qaqa vaka 22 e na nona vakaqiqici ira na kena i sau ka druka vaka 16, ka tai vakadua.