E SA mai vakasuka o Avenisi Vasuinubu mai na timi ni Viti vei ira na yabaki 20 (Under 20) kina sotasota ni Junior World Cup ka me na vakayacori mai Sauca Aferika e na vula mai qo.
E sa mai sosomitaki Vasuinubu o Alifereti Mocelutu Junior me na mai tomani ratou na lewe 32 na noda cauravou dauqito. Na vu ni nona sa mai vakasuka o Vasuinubu oya me na lewena na timi ni Bordeaux Beagles Academy e dua na kalavo ni rakavi mai Varanise ka sa veidinadinati oti tu kina me na laki qito kina. E sa na biubiu tiko e na vula qo o vasuinubu me na laki lewena na kalavo ni rakavi qo.
Ia na nodratou vakavakarau na timi ni Viti e sa toso vinaka sara tiko, ka ni sa mai tomani ira talega na cauravou o Alex Hodgeman ka gole mai Niu Siladi kei Sevanaia Galala mai Varanise me rau mai lewena na lewe 32 na cauravou vakarautaki kina timi ni Viti.
O Hodgeman e dau qito ena i tutu ni duru ka a qito voli mai Niu Siladi e na timi ni Canterburry Academy.