E KOTO oqo era na meke ni nodra bose na Vu kei Viti ka vakayacori mai Savukuita e na wai o Nabobuco mai na koro o Rewasau e na loma ni yasana o Naitasiri. Ni wiliwili sara yani.
1. Noqu yadra cala ni kobukobua
Ka sa na vakuvakuru na vanua
Sa vura na waqa ni Seatura
Ra vodoka mai na sau ni vanua
Ra matabose kei vuravura
2. Noqu dabe toka au vakananuma
Meu raici ira na Ai Sokula
Ra taceba e loma ni wasa bula
Mata ni Kadavu kena i karua
Na Vu ni Beqa sa domobula
3. Na vula ko Okotova sa cila
Donuya mai na i ka lima ni siga
Na mataniwai sa dola kina
Vua sese na Meli Sitima
Tu vakadua ka vakaraica raica
Taletale
Ni mai rogoca kau sa na tukuna
Na wainimala sa kobua
Sai koya kau tiko e rukuna
4. Lutu na yakavi ni siga vinaka
Na cila ni vula sa daumaka
Rau basika na gone marama
Lomai Navatu e rau vavaca
Lose tiko e dua na kamakama
Me kerei ni vucu i Valebasaga
5. Davo koto e dela loga tuva
Meu vakayadrati vakamalua
Au cecega mai na i tutuvi kuta
Na i boi ni waliwali u tuvusa
Na gone marama e ra mausa
6. Qai vakayadra toka na Matua
Drau sa yadra na marama rua
Me bula o Adi Sovanatabua
Isa Adi Lewa kena i karua
Lili sa ciri vakamalua
Lili sa ciri vakamalua
E tuturu na uca mataidua
7. Noqu dabe toka vakamalua
Kai Qilaqila e ra sa vura
Ra sokota na loma ni wasabula
Savuokuita me udu na mua
Vakarewa na kuila vulavula
8. Nodra kele koto sa bogi dua
Ra taubale na Vu ni vanua
Naisogovatu ra sa butuka
Yadra kina na ovisa au sa saluta
Na bure ni cakacaka ra curuma
9. Na domo ni tama au domobula
Na qaloqalovi mai Burevuta
Na vuniyaqona o Naqeleusa
Ra veiqaravi o Nadawarua
Me ra qaravi kina na Ai Sokula
Taletale
Ni mai rogoca kau sa na tukuna
Na wainimala sa kobua
Sai koya kau tiko e rukuna
10. Tini na kaloko ra sa lokuca
Me dola na bose kei vuravura
Duri cake o Navosavakadua
E tadola na vosa mai gusuna
Wai ni matana e drodro i tuba
Au nanumi ira noqu kawa bula
Ra vakaloloma ra dravudravua
11. Na i talatala sa tekicuva
Me masuta na Kalou bula
Jisu na noqu vakabula
Na bose oqo mo ni nanuma
Me soli na vuku na kaukauwa
Me rauta na tamata yadua
12. Tauvosa o Caverenakoula
O Vatukaloko na noqu yavusa
E ra tauyavu kina na matua
Na Vu ni Mali sa tekicuva
Ra bosea na vukici ni gauna
13. E vosa na mata mai Durukuna
Noqu vosa e sowiri e sowiri vakadua
Tautauvata na gasau kura
Yalo ni tamata e ra duivuka
Duidui na nodra vakabauta
14. Na Kalou cava beka ra masuta
I Jiova na Kalou sa bula
Kei na Yalo Tabu na daunivakasala levu duadua
Sa voleka ni vukici na gauna
Ni rogo na mata ni veiyavusa
Me sa dola ko Naburetabua
Na vale ni bose kei vuravura
Ra qarava tiko noda kawa bula
Taletale
Ni mai rogoca kau sa na tukuna
Na wainimala sa kobua
Sai koya kau tiko e rukuna
15. Na bure oqori sa dola rawa
Mo ni soqo mai me da mai sarava
Me vakadaberi kina nai sala
Me qaravi kina noqu cakacaka
Raica lewa lewa sarava
16. Baba iloilo kece na yasana
Qai kailoma koto na lomana
Isa Taniela raica vinaka
Nodrai loloma noda turaga
17. Na lewe ni bose meu tukuna mada
Dua na udolu tu vakacaca
Ko ira na mata ni veiyasana
E dua na kawa bula nodra mata
O Kalinimolikula na yacana
18. Na loma ni koro meu vakasarava
Me vuravura ni wawa na yacana
Ra dabeca tiko noda turaga
Na i tavi levu ra sa colata
Me ra bula kina na kawa tamata
19. Na loloma na waqa ni cakacaka
Vakatitiqa e sega ni yaga
Sa wasei rua kina na tamata
Me da cakacaka e na yalo vata
Me na qai rawa na tiko vinaka
20. Qai tauvosa tiko na matua
I ragone dou tiko malua
Sa dola na mataniwai bula
Me ra gunu kina na veiyavusa
Taletale
Ni mai rogoca kau sa na tukuna
Ko i au na rosi kei vuravura
Noqu sala voli na vuso ni ua
21. O Rokotuicolo sa tekicuva
Na i vola vivigi e sa ucuna
E tevuka i na teveli kula
Vosa ni vola e sa tukuna
Dua bau na lotu me da taura
Sa vacava o Viti nikua
22. Ni yalo vinaka na marama
Na meke oqo au sa dolava
Na i talanoa ni noqu tebara
Mo ni qai vakasamataka
Se na lako donu se na lako cala
23. Dua noqu vosa au sa tukuna
Sa veisautaki na gauna
Sa suka tale na noda vanua
E ligada na ranadi vulavula
Sa toka donu e lagi ni vula
24. Dua noqu vosa meu kacivaka
Isa Taniela rogoca vinaka
Me ra suka na noda turaga
Nodra veivale kece sa lala
Me ra suka mai ra vakatawana
25. Noqu dabe toka au vakarorogo
Na kato ni vosa vuka e cabolo
Sa wasei rua na loma ni koro
So e ra kaya niu tevoro
So era tadra ni ra moce koto
Na nodra nanuma cala taucoko
26. Noqu dabe toka au vakananuma
Sa tase mai na gauna
Meu na qai kena Kalou sa dua
E sega tale na kequi karua
Rauta rauta ba se vanua