E SEGA ni rawarawa na kena laki sikovi na vanua o Savukuita ka ra dau bose kina na Vu kei Viti e na veitabayabaki sa oti.
Na koro vakaturaga o Rewasau e tiko e na loma ni delana ka digova sobu tu na wai o Nabobuco ka dabe tiko kina na nodra vanua ni bose na Vuda.
Na vanua ni bose qo e na gauna e liu e sega ni dau rawarawa na lako kina, e kaya o Ratu Meli Namaralevu.
Raica na kena i dabedabe, e sa qai so na tamata lelevu era bose i ke, e kaya o Ratu Meli.
E ratou veikau voli ki na vanua ni bose o iratou ga na vuvale vakaturaga ka veiliutaki kina o rau na veiyacani o Ratu Meli kei rau na nona yaca ka veitomani tale tiko ga kina o Ratu Tevita Delasau kei Ratu Peceli Rokosalawa.
Na Vale ni bose qo e kena buturara na vatu ka dabe toka e na batini wai o Nabobuco ka qai viribaiti e na veibabavatu na tai ruarua ni wai.
E conaki vakamatau na buturara ni vale ni bose e na co ka me rawa ni vakabutubutu vinaka.
Na kena conaki na buturara ni vale ni bose e tautauvata sara ga kei na mataqali ibe vakavalagi(rug) conaki tu kina na noda veivale ena gauna qo.
Ia, na babavatu e na yasana i matau e sa laurai vinaka tu ga kina na nodra dabedabe ni vale ni bose me tekivu mai na dua na muana ka laki cava sara yani kina mua vaka kina baranisavu ka yacana tiko o Savukuita.
Na dabedabe e buli vakamatau sara ka tautauvata vinaka na vanua e dabeci ka vaka kina na kena i raviravi.
E so na i dabedabe e rabailevu sara ka so e vakarauta no na kena raba.
Ia na buturara ni valenibose e sa vakamawe tu kina na nona vakayaco nona sau na turaga o Rokotuicolo e na nona mocera kina e dua na marama ka bau tiko talega e na bose.
Na bose talega qo e bau yaco talega yani kina o Dakuwaqa ka dau laki kele sara yani e na vanua ni bose na nona waqa ka qai vesu toka kina vakamatau.