OQO na i toma ni talanoa ni kena cabe na lotu e Vuda me vaka eda sa wilika taumada tiko e na macawa sa oti ka a talanoataka ko qasenivuli vakacegu Nemani Driu mai na koro ko Viseisei, Vuda.
1835
Qai rogovaki mai na cabe ni lotu mai Lakeba e na 1835, ia, sa oti e ciwa (9) na yabaki na kena sa lotu tu na Mua-i-ra ni Vanua.
1875
Mai bale na Muavesi Momo Levu Nasarowale mai Mereke e na 1875, ni oti e 49 na yabaki ni nodra ciqoma na rarama vou ni Klaou levu tawa raici e na Manuwa ni Mereke e na toba ko Yatuilau. Sa mai kala ka dromu na bula ka ciqoma taumada na rarama vou ka vakararamataki kina na Mua-ira ni Vanua.
1877
Oti e rua na yabaki ni nodra bale na Momo levu mai Mereke e na 1877, sa biu mai na koro makawa ka tekivu mai tawani na koro e Viseisei. E a se maroroi koto ga mai Ekawasewa, na Sautabu mai Mereke na yagodra na Momo levu.
1878
Laki cekati ka kau mai na yagodra na Momo levu e na 1878. Mai davo tu na yagodra e na bure ko Burenivalu, ka sa mani lewa ko Taukei Burenivalu e na gauna ya, ko Vatiliai Tuisabeto, na tukai keitou me sa Sautabu vakamomo ni Vanua o Vuda na nona Yavu.
Sa qai toki o koya kei na nona vuvale e na yavu Naburenivalu e na gauna qo. Na ganei Tai Vatili ko Imeri Butani, a se vakawati e vale levu e Nabasagarua, ka vu ni nona solia na nona yavu o Burenivalu No. 1 me maroroi kina na yagodra na Momo levu, o koya ka ciqoma na i sulu ni lotu.
Na veisolisoli vakaveitavaleni vakaturaga qo e drodrova sobu mai na kawa me yacova mai edaidai.
16 ni Seviteba,1935
Tara oti na i Vakananumi simede e loma ni koro e Viseisei. Na simede ni vakananumi ni yaco mai ni lotu e Vuda ka sega tu na kena i vakadinadina.
Laki keli tale na kedra i bulubulu na Momo levu mai Burenivalu No. 1 ka laki maroroi tu na suidra e Burenivalu No. 2, na vanua sa qai vakadinadinataki ni rau sa luca na nodra i viu, Vola Tabu kei na kote ka sa qai vo ga na i bulukau e tinikaono.
Tauri tani na i bulukau ka laki lotutaki tale na yagodra na Momo levu ni bera ni na laki vakotori e na nodra i davodavo tawa mudu e Naburenivalu No. 1 ni oti na nodra gauna divi talei ni veivakalotutaki.
Sa maroroi tu na i bulukau e na kena kato vakarautaki ka lili no e na daku ni nodra i dabedabe na Turaga na Tui Vuda e na Jone Wesele.
10 Okotova 1935
Vakananumi ni yabaki drau ni lotu e Vuda ka vakatabui kina na kena i vakananumi ka vakayacori sara talega kina na lotu e dela ni Vakananumi.
Na soqo ni marau, vakavinavinaka kei na solevu ni vanua me baleta na tadu mai, ciqomi ka vakamenemenei na lotu e na vanua o Vuda.
Tekivu mai e na 1935, e na i ka 10 ni Okotova e na kena veiyabaki ka tarava, me yacova mai qo, na lotu ni vakananumi kei na vakavinavinaka e se caka tiko ga e na dela ni vakananumi simede ka dau sala vata kei na kena kana vata kei na solevu ni vanua.
Kena sere e vaka koto oqo:-
Dola na noda marau
Dola na noda marau
Na lotu e Vuda sa yabaki drau
Me da vakacaucau
Me da vakacaucau
E tini ka ono na i bulukau (baleta na i bulukau ni kote e 16)
1887
Veivakalotutaki mai Colo kei Navosa e na i lakolako mai Davuilevu o Rev. Thomas Baker ka via vakadinadinataka na i tukutuku ni sa lotu o Vuda, ia e ka ni rarawa ni a labati vata kei iratou nona i lawalawa mai Navatusila, ka ke a yaco dina mai Vuda ke a vakadeitaka ni a sa ciqomi oti na lotu e ke e na 61 na yabaki yani ki liu (1826). E na vakadidike nei Rev. Isimeli B. Radrodro, na i liuliu ni Vuli Talatala mai Davuilevu, e na nona i vola kei na kena ulutaga Isa Oilei O Navosa, a vola koto kina na nona tagi lagalaga e dua na marama ni Viseisei ka vakawati i Navatusila, e na gauna e ratou sa davo matemate koto kina o Rev. Baker kei na nona i lawalawa.
E tukuni ni a kauta na marama ni Viseisei e dua na tavaya waiwai niu kei na dua na masi me laki ubia ka lumuta kina na yago i Talatala Baker.
A vakadeitaka o Rev Radrodro ni veika a cakava na marama ni Viseisei ya e vakadeitaka ni a cavutu mai na dua na vanua sa vakararamataki oti tu e na lotu.
Oqori ni oti e 61 na yabaki na nona ciqoma na sulu ni lotu mai Nabasagarua na Momo levu Nasorowale Nayacalevu na Tui Ra, na Sau ni vanua.