O Ratu Jone Lecia na qaqa ni valu ka bulu koto e na kedrau tadrua na koro vakaturaga o Rewasau kei Naqelewai.
E kaya o Ratu Tevita Delasau ni turaga qo o Ratu Lecia e a tukuni yani vei ratou mai na koro vakaturaga o Rewasau na vanua e dodonu me dau laki vala kina ka soli tiko yani na kena lewa vei ratou.
E soli yani i ke vei keitou na lewa ni nona dau laki valu o Ratu Jone Lecia, e kaya o Ratu Tevita.
E vakaraitaka o koya ka lewe ni Sauturaga ni yavusa o Devodevo ni a soli yani i Rewasau na kaukauwa vei Ratu Jone me dau laki vala ena gauna ko ya.
Na vosa e cavuti vua me na sautaki tuakana, me na daunikena ka me na nona matanivanua turaga, e kaya o Ratu Tevita.
E na veigauna kece ni dau laki valu o Ratu Lecia e sa lako vata tiko kei koya na kaukauwa kei na mana ni kena sa soli vua na i tavi me na vakaitavi kina, e kaya o Ratu Tevita.
Na turaga qo o Ratu Lecia e a kauta mai na i sulu ni lotu vei keimami e ke, ka a laki kauta mai Bau na i sulu ni lotu ka taubaletaka cake mai, e kaya o Ratu Tevita.
Na nona i bulubulu na turaga qo ko Ratu Lecia e buluti koto vakamatau e na babavatu ka qai mai viribaiti vinaka koto vakamatau e na binibini vatu, ka dabe vakababa toka e na dela ni binibini vatu oya e dua na kau ka dau lili tiko kina na masi.
Ni da raica vakavoleka na bulubulu oya e dabe dina tiko e delana na kau oya ka se bera ga ni vuca, ia, e a vakaliligi tiko kina na masi e na gauna e a buluti kina na turaga oqo.
Na taro e lomatarotaro voli kina se a kau cake vakacava na yagona na turaga oqo e na gauna e bale kina ka laki buluti vakacava e na babavatu ko ya.
Ia, e kainaki ni a vakayagataki na bitu me kabataki cake kina na yagona.
Na bitu ka vakayagataki me i kabakaba e sa bula tiko e na gauna qo.
Eda kila vinaka ni dau kena i vakarau ena gauna e liu ni dau bale e dua na turaga levu e dau i loloku e dua ka dau vakamatei talega na marama watidra.
E dau tiko talega o ira na lewe ni nona vuvale era dau bole mera mate vata kaya.
E levu na i valu e na ulu ni colo ni vanua e valu kina na turaga oqo ka qaqa kina.
Na turaga qo e a qai bulu koto e na baranivatu ka bulu koto e rukuna na turaga tuakana ko Ratu Avenisa Duadelavuvu.