ME vaka esa ka ni veitalanoa tiko ka da sa vakadinadinataka tiko na veisau esa tara tiko na noda i tovo vakavanua.
Eso na i tovo e laurai ni veicoqacoqa kei na noda yavu ni bula dina vakaitaukei.
Esa levu na duidui kei na mavoa e sa kune ena noda bula vakaitikotiko kei na bula vakaveiwekani ka sa sega ni matata sara e vuqa na i tovo ni bula ena veisiga.
Esa sega na veivakabulataki, e sa sega na veirokorokovi kei na veikauwaitaki e ra dau vakaitovotaki ira kina na noda qase.
E dau tukuni tu ni sa curumi uciwai.
Na luluqa ni i tovo oqori, ena kena sa lecaika talega na vanua ena kena sa dau sega ni rogo na vosa vakavanua mai vei ira na i liuliu ni vanua ena veigauna.
E sa sega ni caka tiko na veika oqo ena noda koro vakaitaukei.
Na dui matalotu talega eda sa dui lewena e sa vakavuna talega me sa qai dredre ga na bula ni veimaliwai vinaka kei na veilomani dina vakaveiwekani.
Ni sa vakaoya na i vakarau ni i tovo ni bula vakavanua, esa veisau talega na i walewale ni noda veisusu vei ira na noda i solisoli.
E sega walega ni rau veivuke ena veisusu o tama kei tina. Era veivuke talega ena veisusugi o ira na weka ni solisoli se na vanua.
E vakaraitaka o Semi Seruvakula, e Qasenivuli vakacegu ni sa i tavi ni vanua na nodra tuberi na gone.
Baleta ni gauna e laki vakaitavi ka qarava vinaka e dua na gone na nona vuli, na cakacaka, ena tarogi ga na nona vanua, na nona koro kei na vuvale ena vuku ni veisusu vinaka, e kaya o Seruvakula.
E vosa vakabibi o Seruvakula, ni gauna era dau veivakanakuitaki kina o ira na tubuni gone se na vugodra na gone, e sa rogo mai na vosa:
Me da sa dui vakavulica ga na dui luveda, se o iko o sega ni lewa e dua na ka vua na luvequ! e kaya o Seruvakula.
E dua talega na ka e sa mai sega ni matata vinaka, oya na lawa e sa taurivaki tiko ena gauna nikua.
Na kena sa vakatabui na veimoku mai vei ira na qasenvuli, ka rawa ga ni veimoku o Qasenivuli Liu.
E sa rawa ni kau ena mataveilewai o tubutubu se e dua e laurai ni veivakamavoataki se veivakasaurarataki vua e dua na gone ena vuku ni moku e dau vakayacori.
E qai tiko tale na vosa ni Vola Tabu, oya ni kevaka era beseka na vosa na luvemu, me ra na kanakuitaki na gone kevaka era cakava e dua na ka e cala. Oqo e sala ni nodra veivakatavulici na i solisoli me ra gone vinaka.
Eso na i tubutubu era sa qai sega ni kila se evei vei ira na i tovo se na lawa ni bula cava me na susugi gone mai kina.
Tukuna o Qasenivuli Seruvakula ni ka bibi vei keda na i tubutubu me da kila ni vanua e veisusu ena nona tubu cake mai e dua na gone.
E dua na vakabauta taleitaki ena susu gone ena koro o ya ni sa nodrau i tavi na i tubutubu ni gone me rau susuga na gone me tekivu mai na gauna e sucu kina ka yacova ni sa curu ki tautuba ka rawa me lako voli e loma ni koro kei na so na nona i caba.
Esa nuitaki keda na qase eda bula ena loma ni koro me da tuberi ira cake, ka tomana na veituberi e rau vakayacora na nona i tubutubu mai vale.
Oqo na veituberi ena i vakarau ni bula e loma ni koro, ka vakabibitaki kina na rokovi ni dua tale na vale se loma ni bai, na vakatabui ni vakasausa, na nodra rokovi na qase, na tukuni vua na gone se rau veicavatakini kei na dua e loma ni mataqali se loma ni koro, e vakamacalataka o Seruvakula. E vakamacalataka o Seruvakula ni noda veivuketaka vata na nodra qaravi na i solisoli - ena bulia cake e dua na gone oya me na kila ni ra a veivuke o ira na vugona, na tubuna kei na tukana ena nona tuberi me dua na gone yaga ena veisiga mai muri.
E sega talega ni rawarawa na qaravi ni solisoli ena gauna nikua- na nodra vakani, na nodra vakasulumi, na nodra vakamarautaki kei na noda susuga cake e dua na bula ni gone me na laki tamata yaga ka yalomatua.