ESA mai voroki oti e 17 na sausau ena sotasota ni veisivi qalo ka yacana tiko na Fiji Swimming Long Course Age Group ka vakayacori tiko e na Damodar Aquatic Centre.
O Temafa Yalimaiwai mai na soqosoqo ni qalo na Tritons e a voroka e dua na sausau ka se biu tu mai na 14 na yabaki sa oti e na nodra wasewase ni veisivi qalo vei ira na yabaki 9 kei na 10 ena gonetagane ka yacana tiko na Freestyle e na 100 na mita ka qalova kina na gauna oya e 1:09:83 na sekodi.
Na gauna taumada oya e 1:12 na sekodi ka tekia taumada o Wilson Vaivao mai na soqosoqo ni Nadi Airport Club e na 1998.
E a tekia talega nai karua ni sausau o Yalimaiwai ena qalo ka vakatokai tiko me butterfly e na 50 na mita e na nona voroka ga na nona i sausau e na 00:69 na sekodi.
O Rosemarry Raova mai na timi ni Barracuda e voro sausau talega vei ira na goneyalewa yabaki 10 ena qalo ka vakatokai tiko na Backstoke e na 50 na mita ena gauna oya e 00:91 na sekodi.
Na gauna taumada oya e 44:03 na sekodi ka tekia tu o Adele Rova na tuakana e na yabaki 2007.
Vei ira talega na goneyalewa yabaki 15 kei na 16, e voro sausau kina o Matalita Buadromo mai na timi ni Triton e na nona veiqatitaka na qalo kei an nona i tokani o Tieri.
E ra mai vakaitavi talega e na sotasota qo e vitu na dauqalo mai Samoa e na soqosoqo ni qalo na Tanifa O Le Vai.
E vakaraitaka na dauniveivakatavulici ni soqosoqo ni qalo qo mai Samoa oya ko Suzie Schuster ni a vakavinavianka kina soqosoqo ni qalo e Viti e na nona vakatara me mai vakaitavi talega na nodratou dau qalo.
E ra marautaka na dauqalo mai Samoa na vakatagedegede ni qalo e ra mai soatva vei ira na dauqalo ni Viti.
Na timi mai Samoa qo e ratou via mai vakaitavi ena sotasota qo me rawa ni ratou vakavakarau kina sotasota ni Ocenia Swimming Championships ka na vakayacori mai Niu Kaledonia e na mua ni vula qo.
E rauta ni ra lewe 130 taucoko na levu ni dauqalo e ra vakaitavi e na sotasota qo.
Mai vei ira na veisivisivi qo e rauta ni ra lewe 90 na dauqalo e ra sa lako cake kina fainala. Sa nuitaki ni na duatani sara na veitau qalo e na yabaki mai qo.