E sega ni guce e na qaravi qele ko Ratu Elisa Buliciri Waqanivavalagi e na loma ni 86 na yabaki ni nona bula me yacova mai nikua.
Mai na balavu ni gauna oqori e dau raica o koya ni ka bibi na kena dau vakayagataki na veitiki ni qele e tiko wavolivoliti keda.
Na veitiki ni qele lailai oqori e sa rawa tiko kina na bula, e kaya na turaga ni Rakiraki, Yale, Kadavu oqo.
E ra a biubiu mai e na nodra delaniyavu ko Waqanivavalagi e na yabaki 1942. Oqo e na vuku ni lewa ka tau mai vei Ratu Sukuna, a ya mera bole lewe ya rua mai na veikoro mai Kadavu e na kena mai talaci na nodra i yaya na kai Mereke.
Au a mani bole tu mai me vaka ni sa leqa na noqu i tubutubu turaga e na gauna au se qai kalasi lima kina, ka sa sega ni dua e qarava na noqu vuli.
Ni oti oya, e ra a mai curu e na mataivalu cakacaka e na loma ni rua na yabaki, ka qai dewa sara yani e na veisosomitaki ki Solomone me yacova na gauna era suka mai kina e na yabaki 1945.
E vakaraitaka ko Waqanivavalagi na nona dau taura dei na i vuvuli nei tubuna e na nona dau kaya; na cakacaka eda na sega ni mate kina.
Eda na mate ga ena noda sakita na yaqona se na noda sakita na yalewa ke se bera na kena gauna, e kaya ko Waqanivavalagi.
E liu talega, o koya ga na turaga e dau teitei ena dau vinakati mai vei ira na marama, ka vaka talega kina vei ira na marama, o koya ga e dau talitali e dau vinakati mai vei ira na turaga.
E na yabaki 1986 era a vakacegu mai kina e na nodra cakacaka ka mai tauyavu sara ena dua na tiki ni qele ka sa volia oti toka e Samabula .
E a tadevo kece tu na yasa ni vale, kau sa qai dau mai buluta tiko vakalalai meu rawa ni teitei kina.
E vakaraitaka ko Waqanivavalagi ni so vei ira na uvi oqori era tei tu ga e na qara ni nona duru ni vale na turaga ni idia ka dau tawana tu e liu na vanua koya.
Era dau kaya na kena turaga e liu, na i yau kece eda vaqara era moce kece tu e na ruku ni kakana.
Oya na kena bibi na kakana kivei keda na tamata.
E vakaraitaka talega ko Waqanivavalagi ni dodonu kivei ira na turaga era tiko e na dua na tiki ni qele mera teitei tiko e na veisiga kece baleta ni da kana tiko e na veisiga kece sara. O keda eda sega ni dravudravua baleta na keda kakana e tiko ga e na noda yasa ni vale, e kaya.
E vakabibitaka talega ko Waqanivavalagi na noda qarauna na kena cakacakataki vakavinaka na gauna ka vaka talega kina na kena vakayagataki vakavinaka na veitiki ni qele e tiko vakawavolivoliti keda vakauasivi e na noda veikorkoro.