ENA mataka caca ni Moniti na i ka 10 ni Tiseba, e rau sa sou vakamataka o Satini Mejia Jester mai na Delata Force kei na dua vei iratou na lewe ni Green Beret me rau tovolea me rau yacova yani na i yala ni vanua era vakatawana na Al-Qaeda. Na i naki ni nodrau lako me rau lai vakaraica se tiko e vei na nodra veiqaravata na Al-Qaeda.
Ia e rau lesu mai ki na vanua e toka kina na valeniyadra ni sega ni kunei rawa e dua na qaravatu. E sega tiko ni cegu na lomadrau o Satini Mejia Jester kei Durgan mai na Delta Force ka rau sasaga tale e na sigalevu.
Erau a lai toka vuni e na dua na yasa ni vatu e na dua na delana ka rau vakayagataka na i vakadodorairai raiyawa kei na Iloilo ni vakalevutaki-ka, erau mani raica rawa e tolu na i curucuru ki na qaravatu; na kena oya e sega ni laurai rawa mai vei ira era rai ga e matadra.
A lewa o Kanala Dalton me salavata kei na mataivalu nei Ali e dua na i lawalawa ni Delta Force me ratou lai tawana tale ga na vale ni yadra e toka e na ceva ni veiulunivanua.
Eratou mani gole kina o Hopper kei Admiral mai na Delta Force kei Adam Khan na dauvakadewavosa ni CIA ka salavata voli kei iratou na Delta.
Eratou sa dabe veicurumaki ko iratou na lewe tolu oya e loma ni lori kei ira na lewe ni mataivalu vakayavusa nei General Ali. Na kedratou i rairai kei na nodratou i sulusulu, sa sega sara ni dua na kedratou duidui kei ira na lewe ni mataivalu vakayavusa nei General Ali.
Na i sulu babalavu e tekivu mai tabadra ka yaco ki yavadra, na i vauvau ni ulu kei na i sala (pakool), na sikavu e domodra kei nai oro e tolodra, sa sega ni dua na ka e vo.
E dua ga na ka eratou duidui kina, aya ni ko ira na lewe ni mataivalu nei General Ali era roqo toka e yadua na dakai makawa ni Rusia, na Kalashnikovs (AK-47). E toka vata kei na 90 na kena gasau (7.62mm), me cowiri vakatolu na kena vanataki, aya me 30 na gasau me vanataki e na dua na wavoki.
Ia ko i rau na gone mai na Delta Force, o Hopper kei Admiral e rau tauyarua toka na dakai ni vala ni gauna vou na 5.56mm M-4 assault rifles ka toka vata kei na kena i vakadodorairai rama livaliva na AN-PEQ2 lasers.
E na ruku ni dua vei rau na dakai oya, e toka kina na i tabataba ni gasaukuro ( M-203 launcher) ka dau vanataka na gasau kacabote ka tiko sara ecake na kaukauwa ni kena vakacaca. Nodrau taga ni jakete e tuva sobu ka ra tawa tiko kina na gasaukuro viritaki (grenades), na gasau ni dakai ka sivia ni 1500, vica na tavaya wai, na i yaya ni veivuke e na gauna ni leqa tubu koso ka vakakina e vica vata na retio. E tiko talega vei rau e dua na mataqali cina livaliva lailai ka rawa ni laurai mai na vica vata na maile mai maliwalala na kena rarama ka vakina e dua na retio lailai ka rawa kina vei rau me rau vosa kina vei ira na pailate ka ra vuka tiko ena vica na udolu na fiti e macawa.
Sa qai mai toka yani na SOFLAM (Special Operation Force Laser Marker), oqo na misini lailai ka dau dabe e na dela ni dakai me dusia na takete, ka solia tale ga na yawa ni vanua e na kena dodonu taucoko me vanai donu kina na takete, ka sega ni vakabi ki na i mawi se ki na i matau, sega ni cici ki cake se ki ra ka sega talega ni lako sivita se yaco koso.
Ena gauna era sa tekivu cabeta cake kina na veiulunivanua, sa kacakacabote e yasadra na rokete vanataki (mortars) mai vei ira na Al-Qaeda.
Era sauma yani na lewe ni mataivalu nei General Ali, ia e sega ni matata vei iratou na kai Amerika se cava era vana tiko na i lawalawa nei Ali ka ni ra sega ni raica rawa tiko mada ga na meca se vanua era vanavana tiko mai kina.
Na levu ga ni nodra cavuikalawa ki liu, na levu talega ni gasaukuro vanataki e tau e yasadra. Sa rerevaki dina na vanua era lakova cake yani ka ni ratou laurai vakavinaka tiko mai vei ira na lewe ni Al Qaeda; e sega ni cegu na mimiri mai ni rokete vanataki (mortars).
Sa vaka era tu suka na i lawalawa nei Ali, ia eratou sasaga na kai Amerika me ratou toso vakataki iratou ki liu me yacova ni ratou sa lai toka e na dua na delana. Era sa qai raica talega e keya na lewe ni mataivalu nei General Ali na vakadomobula ni ka eratou cakava na lewe tolu na kai Amerika ena nodratou vanavana ka lako vata na kena vanataki na gasaukuro dau kacabote.
Eratou kunea rawa e dua na i tikotiko liu ni mataivalu (command post) ka sa lala toka, eratou luvata nodratou i drekedreke bibi ka ratou saga me ratou vakadikeva na gusu ni qara e kalu tiko mai kina na rokete vanataki. Oya talega na vanua eratou dabe toka kina na dakainivanua ka vanataki tiko mai kina na rokete (mortars).
E rau cakacakataka na mape o Hopper kei Admiral ka rau vakarautaka vakafika na yawa ni vanua mai maliwa lala ka raica vata na i tuvaki ni vanua e vanataki tiko mai kina na gasaukuro kacabote.
A tara nona taga ni jakete o Admiral ka taura mai kina na retio lailai e davo no kina.
Era qai kidacala na tini vakacaca na pailate ni waqavuka dauvakalutu bomu ka ra vukaca tiko na maliwa lala, ni sa rogo e dua na domo vou, e domo tau malua, makare qai dei. E vaka oqo na ka e tukuna:
Ni sa bula vinaka. O au o Admiral mai na i lawalawa lailai dauvala na Delta Force.
Sa ka dokai vei au meu na vakasalataki kemuni tiko yani e na yakavi oqo ka vakakina e na dua na i wase ni bogi nikua, ena vanua mo ni vakalutuma kina nomuni bomu.
Au kerera moni dolava tiko nomuni walesi. Au sa vakanuinui ni da na veitokonitaka na i tavi bibi sa koto oqo e matada, a tinia o Admiral.
Eratou a qarava tiko mai na i tavi ni nodra vakasalataki na pailate ena vica na macawa sa sivi na lewe ni Green Beret.
Ia, e levu na bomu e vakalutumi e na vanua cala, ka levu tale ga na nodra ito era mate ka vuetaki kina.
Ia oqo era sa rogoca na pailate, ni sa dua na timi vou sa curuma na veiulunivanua e Tora Bora ka vaka e vakacaudreva e dua na yalo vou na domo ka vosa mai oya. .
A sasaga o Hopper me tarai rau o Satini Mejia Jester kei Durgan e na siteseni ni yadra ena tokalau ni veiulunivanua, ia sa sega ni tara rawa na veitaratara ki kea na walesi ni FM ka tiko vua ni sa latia na biau livaliva na veiulunivanua cere.
Erau sega tiko ni kila o Satini Mejia Jester kei Durgan ni ratou sa cabe mai yasana kadua o Hopper, Admiral vata kei Adam Khan.
Eratou curu maliwai ira cake na lewe ni Mataivalu nei General Ali.
Ena gauna ga e tauca yani kina nona i vakaro o Kanala Dalton vei rau o Jester kei Durgan, e rau sa mai toka wawa voli yani na satini mejia e rua vata kei iratou na lewe ni Green Beret ka ratou dau yadrava tiko na siteseni oya.
Sa oti e rauta ni dua na auwa, sa rogo mai ena walesi nona kaikaila e dua na turaganivalu nei General Ali ka vakaraitaka mai ni laurai o Osama bin Laden kei iratou e so nona i lawalawa e na dua na delana; ka ra sa wavokita tu na veiyasa ni delana mai ra na lewe ni mataivalu nei General Ali.
E kerea vagumatua na turaganivalu oya me vakalutumi vakalevu na bomu ena delana oya.
E rau sa cakacaka sara o Satini Mejia Jester kei Durgan ena mape kei na kena tovolei me droinitaki na yasa ni ulunivanua e cavuta tiko mai na turaganivalu nei Ali.
Ni ratou se sasaga veitaratara tiko ga ena walesi me vakadewataki vei ira na pailate, sa katuvu vakaveitaravi na bomu ena vanua sara ga eratou raitayaloyalotaka me vakalutumi kina.
Eratou kidacala ka vakatataro vei iratou na pailate se o cei e vakasalataka vei iratou na vanua me ratou vakalutuma kina na bomu, a sauma mai e dua na pailate, ni dua na domo vou sa veidusimaki tiko yani e dela ni qele vei iratou.
Ia na domo vou oya, e bulusai vinaka sara toka ga na takete kece e cavuta yani.
Eratou sega tiko ni kila na ilawalawa nei Satini Mejia Durgan kei Jester ni sa baci qarava o Admiral e dua na taba ni cakacaka ka kenadau kina.
Eratou mani vakatataro vei Kanala Dalton se ocei sa taura na i i tavi a qarava tiko mai na siteseni e na tokalau, a qai sauma yani o Kanala Daltan ni ratou sa toka e na ceva ni ulunivanua o Hopper, o Admiral kei Adam Khan.
E rau sa kila ekeya na satini mejia ni sa toka e nona yalava o Admiral ena nodra vakauti donu na B-52 bombers lelevu ki na vanua me ra talaca kina na nodra usana.
Ni sa lutu veitaravi na bomu, era sa sorova talega na lewe ni mataivalu nei Ali ena nodra vanavana vakaveitalia, raramusumusu ga na veitolo ni kau ka ratou leve na kai Amerika ni sa cawi e dela ni uludratou nodra gasau na lewe ni mataivalu vakayavusa.
Ni sa tasoro na vanavana ka lai cegu ni sa oti e 30 na gasau, era tawana na i karua ni wavoki ka ra sorova tale, lai oti, tawa tale na i katolu.
Ni sa oti ga oya sa oti na i tavi ni dua na siga ka ni sa oti na 90 na gasau vakarautaki me baleta na siga oya.
Era sega ni via kila se bau dua na ka yaga era vana e na 90 na gasau oya. Sa lutu mai na karobo ka sa gauna me ra veitau sobu ki na buca me ra lai vakacegu ka moce talega.
Eratou kidroa dina na kai Amerika ena nodra sa biuta tu yani na buca ni i valu na lewe ni mataivalu nei General Ali ena nodra sa veitau sobu ki na keba mai ra, ni ra dau rerevaka na buto.
Sa vakarogotaki yani vei Kanala Dalton ni sa laurai tale o Osama bin Laden ena dua na yasa ni ulunivanua ka vaka e sa biuta na qaravatu a nanumi ni a tiko voli kina.
Ko ira na lewe ni mataivalu nei General Ali ka ra a wavokita tu na delana oya, era sa yali ka ni ra sa naulu sobu ki na koro baleta sa toro mai na bogi.
Sa laurai tiko o Osama bin-Laden, ia sa sega ni kune na kedra O ko ira na lewe ni mataivalu nei General Ali ka ra a yalataka me ra tokoni iratou na kai Amerika. Eratou sa qai vo toka ga na lewe tolu na kai Amerika, kei na lima na tamata nei General Ali ka vakamasuti iratou o Adam Khan me ratou tiko mai.
Eda sa na yala mada eke ka me na qai kuri tale yani e na macawa mai oqo.