Ni vakauqeti tiko na lewenivanua ni saumi livaliva tiko vei FEA mo ni vakaraica tale vakavinaka na nomuni bili ni livaliva ena loma ni ono na vula sa oti.
E lako tiko mai na kaci oqo ena vuku ni kudru e mai ciqoma na Matabose ni Dauvolivoli (Consumer Council of Fiji) ena vuku ni nodra mai ciqoma na nodra livaliva o ira na Dauvolivoli oqo qai laurai ni sivia nai vakadei e lavaki tiko mai me ra sauma.
E kurabui vakalevu na Matabose na matata ni tukutuku e ratou biuta na FEA me baleta na vovo ni ivakadei me ra sauma na Dauvolivoli ena nodra bili ni livaliva ni ono na vula, ia ratou qai vakacala tiko vakalevu na kena dau lavaki mai na ivakadei ni bili oqo, ka so na gauna e dau lai vakavuna me vakarua taki na levu ni bili ka tarava.
Enai ka 5 ni siga ni Me, 2012 ratou biuta ena niusiveva na FEA edua nai tukutuku saumi me ra kila tiko na lewenivanua na tiki ni siga cava e dodonu me saumi kina nai vakadei oqo na security deposit, oya nai ka 31 ni siga ni Me. Ke sega ena musu na nodra livaliva.
Ena dua na kudru e ciqoma na Matabose e ratou a qai kere veivosoti kina na FEA.
Ratou ciqoma na cala ni nodratou a lavaka sivia nai vakadei meu sauma na lewenivanua oqo ka dodonu me $64.16, ia ratou qai biuta na nona bili me sauma e $106.93.
Ena dua tale na kisi e sauma edua na Dauvolivoli na nona security deposit ni $71.55, ia ena nona bili e tarava sa basika ga mai e $47.66 me sauma.
E so na ka va oqo e mai vakavuna na lomaleqa kei na lomatarotaro ni Matabose me baleta na kena dau cakacakataki na security deposit ena veivula.
Se cava na vuna e lailai kina na vula oqo, qai vula tarava sa veitubutuburi cake.
E kuria vakalevu talega na lomaleqa ni Matabose oya na kena dau tabaki mai nai wiliwili ni security deposit me saumi ena dua na vula ia qai sega ni vakamatataki vua na lewenivanua e sausaumi tiko e vica na nona security deposit sa sauma oti.
E qai dau biu ga na notisi vei koya e sausaumi nai otioti ni siga me na saumi kina nai vakadei oqo.
Sa mai ciqoma talega na Matabose eso na kudru ni ra sauma tiko vakarua nai wiliwili ni vakadei e dodonu me ra sauma.
E lomaleqataka na Matabose ni ra sega tiko ni kila na lewenivanua na ka ra e dodonu me ra sauma ena nodra security deposit ka levu vei ira era sa lai sauma tiko qai ra sega ni kidava tiko na veileqa eso e sa vakamacalataki toka e cake.
E sa dodonu talega vei keda na lewenivanau me da na dau qaqarauni e na kena vakayagataki na livaliva ka me na dau vakamaninitaki vakabibi mai vei ira na luveda e ra tiko e vale.
Ni sa vakamasuti na lewenivanua mo ni wilika tale vakavinaka na nomuni bili ni livaliva.