ESA oti oqo e va na yabaki na nodrau taura tiko mai o Talatala Ame Tugaue kei Talatala Tuikilakila Waqairatu na veiliutaki ena loma ni Lotu Wesele.
Vakaraitaki mai ni kevaka esa na vakadonui mai na i vola tara me na vakayacori na Bose ko Viti, e sa na caka saraga na veidigidigi ena vuku ni kena mai rube tiko ena loma ni va na yabaki sa oti na Koniferedi ni lotu.
E rauta ni 300,000 na i wiliwili ni lewenilotu- ka levu na lewenivanua e Viti era lotu Wesele.
Vakadeitaka mai na tabana ni ovisa, o Turaganiovisa Rusiate Tuidravu ni sa tiko ena nona teveli ni veiqaravi na i Liuliu ni Ovisa na i vola kerekere ni Lotu Wesele kei na veika ena veivosakitaki ena vula o Okosita.
E a vakarubeci tu mai na cicivaki ni Bose ko Viti se na Koniferedi ni lotu mai na 2008 me yacova mai na yabaki sa oti.
E dau veiya tolu na yabaki e dau soli kina Bose ko Viti ena kena digitaki koi rau na i liuliu ni lotu, oya na Peresitedi kei na Vunivola Levu.
Vakadeitaka mai o Talatala Tevita Nawadra, na i vukevuke ni Vunivola Levu ni sa gadrevi sara tiko ke rawa ni caka na Bose ko Viti.
Me rawa ni caka kina na veidigidigi ena loma ni lotu, ka sa yabaki 5 tiko mai na nodrau cicivaka tiko mai na i tutu ni veiliutaki o Talatala Ame kei Talatala Waqairatu.
E na macawa sa oti, esa mai vakacavari vinaka talega kina e vica na i wasewase ena nodra sa qarava oti na nodra Bose Vakayabaki.
Tukuna o Talatala Nawadra ni so na veiwasewase era yawa mai Viti Levu kei na taoni, era na qai bose vakayabaki tiko yani ena vula mai oqo, ena kena na taura tiko na gauna me na kerei na nodra i vola tara ni kena vakayacori na nodra bose ni wasewase.
Ka na tabaki kece mai vakavinaka na veika ena vinakati mena mai veitalanoataki ena Bose ko Viti.
Ena Bose ni Wasewase o Suva, e veivakadreti kina o Talatala Sakaraia Koli, na Talatala Qase ni dodonu mena vakadeitaki mai vakavinaka na i wiliwili ni lewenilotu.
E laurai ni lutu ena 82 na i wiliwili ni lewenilotu ena loma ni wasewase o Suva.
Mai na 10, 567 ena 2011, ena yabaki oqo e rauta ni 10, 649 na i wiliwili ena yabaki oqo.