E VICA na ulutaga lelevu esa mai vakatututaki kina Bose Levu ni Koniferedi ni Lotu Wesele ena yabaki oqo mai na Wasewase o Suva.
E vakaraitaka o Talatala Qase Sakaraia Koli ni sa vakatututaki me na Yabaki ni Vuvale na yabaki mai oqo 2013.
Me vakabibitaki ena veivakatagedegede ni tuvatuva kece sara ni lotu kei na veisoqosoqo na vakalotutaki ni vuvale, e kaya o Talatala Sakaraia Koli.
E dua talega na kauwai eratou kauwaitaka na Wasewase o Suva oya me vakamatatataki se ko cei sara mada e dodonu me ra wiliki mera soqosoqo ni Turaga.
E vu oqo ena kena sega ni vakadeitaki rawa tiko na i wiliwili ka me na yavutaki kina na cau mai na vei Tabacakacaka ena vuku ni cakacaka me na qaravi (project) kei na veika tale eso e gadrevi mai na i soqosoqo levu.
E dua talega na kauwai e tiko oya me na vakamacalataki kece vakaivola na qele kece vakaitaukei ka sa tuara na lotu ka me vakamatatataki kina na gauna kei na yacadra na vakaitavi ena veisolisoli, e kaya o Talatala Koli.
E sa gadrevi talega na tuvatuva ka ni Lotu Wesele ena kena qaravi vinaka na i tuvatuva ni lotu mai na valenivolavola ka me drodrova yani na Wasewase, Tabacakacaka ka curuma yani na kena veivalenilotu.
Tukuna o Talatala Sakaraia Koli ni gauna oqo e sa 10.649 na i wiliwili ni lewe ni lotu ena Wasewase o Suva ena yabaki oqo.
Mai na i wiliwili oqori, e 6000 era sa Siga Dina, ka 4000 vakacaca na Siga Tuberi.
E vakaraitaka vei ira na lewenibose o Talatala Sakaraia Koli ni dodonu mena vakamuri vakavinaka na nodra dau vakacurumi na Dauvunau yaco, oya me ra na dau tarogi vei ira na lewe ni bose.
Me kua ni dau takosovi na Veitarogi Vakatawa, e totoka me dabeci kece sara na tolu na veitarogi ni bera ni da yaco kina dela ni ulunivanua.
Au sa vakavinavinaka ni sa totoka na i sevu ena veiyabak. Ni tomana, ni oqo sa vakaraitaka na sautu.
Tukuna na sautu ena gauna ni drakidrakita, e kaya o Talatala ena nona dolava na bose ni wasewase ena Tusiti ni macawa sa oti.
E veivakasalataki vei ira na lewenibose oya me ra dau nanumi na sega ni rawa ka ena kena vueti na cakacaka ni Lotu.
O koya sa soli ena lomavinaka sa vinakata na Kalou, e kaya.
Vakaraitaka ni wali vakavinaka na leqa oqo ena noda dau solesolevaki.