ESA vakadinadinataka tiko na i soqosoqo ni marama na Senibuatoka mai na koro o Muanaicake, Fulaga mai Lau ni vurevure ni i lavo vinaka e tikoga ena nomu i yau bula kei na taledi e dui vakalougatataki keda kina na Kalou.
Vakaraitaka o Rusila Jikosaya, yabaki 49 ni sa vakadinadinataka tiko na veika oqo ena tali ibe, na tali rubu kei na i yaya vaka- Viti e dau volitaki ena nodratou teveli ena makete levu e Suva.
Na nodratou teveli oqo e tiko ena nodra yasa ni makete na marama ka a dolavi vou ena yabaki sa oti, me dau vukei ira na i soqosoqo ni marama ena kena vaqaqacotaki na nodra bula ni rawa- ka kei na veivakatoroicaketaki raraba.
E vakadinadinataka talega o Rusila ni dua na i voli oqo na ibe, e sa i voli naba dua vei ira na vakamakete.
E sega ni dua na ibe me na tiko dei ena teveli ni volivolitaki.
Era kau ga mai, era voli tale, na kena totolo ni volitaki, e kalougata me siga rua ena nomu teveli na ibe, tukuna o Rusila.
Me vaka ni marama ni Fulaga, e dau dua tiko na mataqali ibe era dau talia oya na volikoro.
Tukuna o Rusila ni ibe oqori kei na ibe ni nodra roqoti na gone vou, eratou dau kena dau sara, ka cagina ga vaka na keke na kena dau volitaki ena makete.
E dua talega na taledi e ra kilai tani kina mai Fulaga, oya na magimagi kei na kena dau ta na tanoa ni yaqona.
Era kena dau ena sivisivi ka dau volitaki na nodra cakacaka ni liga kina sitoa ni saravanua o Jacks.
Vakaraitaka o Rusila ni gauna oqo e sa segata tiko me na vakadewataka sobu na taledi ni talitali kei na kena caka mai na voivoi mai na i teitei, e kakay o Rusila.
Ena gauna oqo, ena noqu lesu mai vakavica mai nakoro, e levu vei ira na marama era sa sega ni laki musuka mai na nodra voivoi, ka ra mai vakarautaka me yacova na kena sa laki cibini ni bera ni tali na ibe se na i cakacaka ni liga cava ga era via cakava.
Era sa gole tale tiko na turaga me ra laki qarava mai na i tavi oqori, e kaya.
E vakaraitaka ni so na marama mai na nodratou vanua era sa sega tale tiko ni kila na veiqaravi kece me baleta na voivoi kei na talitali me vaka era dau vakatavulica o ira na marama ena gauna e liu vei ira na goneyalewa ena gauna e susugi cake mai kina e Fulaga.
Ena nodratou teveli ni volivolitaki na Senibuatoka, ko na kila ga ni duatani tiko na nodratou i voli mai vei ira kece na i soqosoqo ni marama ena maqosa ni cakacaka ni liga e volitaki toka ena nodratou teveli.
E da raica ga, eda kila saraga ni nodra talitali se cakacaka ni liga na wekada mai na yatu Lau.