ESA vakadinadinataka tiko e dua na qasenivuli liu ena koronivuli mai Wainibuka, Tailevu ni sa levu na gonevuli i Taukei ena gauna ni kua era sa sega ni kilai ira se na i tukutuku me baleti ira ena vanua era sucu kaya mai.
E vakaraitaka mai kina Nai Lalakai o Rusiate Batiratu na qasenivuli liu mai Nasautoka District School ni dua na luluqa ni i tovo vakaoqo, esa sega walega ni vakadinadinataki ena koro vakavalagi, esa vakadinadinataki talega ena bula vakaitaukei.
Esa oti oqo e yabaki 32 na nona qasenivuli voli mai, ka vakadeitaka ni levu vei keda na i Taukei eda sa sega sara tu madaga ni kila na veika me baleti keda, na i tutu vakavanua cava e dodonu meda na qarava.
Tukuna o Batiratu ni nona dau taura tiko na kalasi ni i tovo ena veisiga Vakaraubuka, e kurabui na nona raica ni levu vei ira na gonevuli e Nasautoka District School era lecaika ena i tukutuku dina me baleti ira.
Era lewe 110 na levu ni gonevuli ena koronivuli oqo.
E a vosa tiko o Batiratu ena veiwasei ka ratou vakarautauka na i Lololo ni Vanua e vakayacori ena valenivolavola ni Soqosoqo ni Qasenivuli i Taukei ena siga Tusiti.
Au qai taroga yani vei ira na gonevuli na nodra mataqali, kei na nodra kau, na ika era sa sega tu ni kila.
Au kurabui sara vakalevu ena veika oqo, kau sa qai raica rawa ni leqa oqo e sa vu sara ga mai vale.
Esa sega mada ga ni vakabibitaki mai vale na i tukutuku vakaoqo me ra kilai ira kina kei na nodra i tavi ena loma ni vanua era bula kina, e kaya o Batiratu.
E vakaraitaka ni levu talega vei keda na i Taukei eda sa sega ni ciqoma tiko na keda i tukutuku dina me vaka ni da bati , se da matanivanua.
Tukuna ni levu era sa kila vinaka sara na i talanoa ena i Vola Tabu kei na veika me baleti ira na Jiu, ia na veika mada ga me da kila ni da kawa i Taukei ni dua na vanua tabu yani, e sa sega saraga ni qai vakadewataki tiko vei ira na gone me ra kila ka maroroya.
Ni da sa gole yani ena veikoro vaka- Viti e levu na i tabagone era sa sega ni kila vinaka tu na vanua kei na yalayala ni veika e dodonu mera na qarava, e kaya.
Oya na vuna e sa levu kina na lecaika kei na veilecalecavi e sa yaco tiko ena noda bula vakaitaukei.
Tukuna o Batiratu ni sa ka bibi na noda yadrava tiko na noda i tavi na i tubutubu ena vuku ni nodra kilai ira tiko na i solisoli ka ra vakavulici tiko ena veika dina me baleti ira, kevaka e sa na sega ni na vakadewataki na i tukutuku oqo, e sa yali yani vakadua na noda i tovo kei na veika eda kilai tani kina na kawa i Taukei.