E RATOU vakadeitaka na goneyalewa ni Waimanu na Adi Cakobau School ni ratou jabeni dina ni qito vei ira na goneyalewa e na Coca Cola Games e na nodratou mai rawata e na macawa sa oti na i covi ena i ka 12 ni yabaki veitaravi.
O Adi Cakobau e ratou a tekivu taura mai vakaveitaravi na i covi ni goneyalewa me vakatekivu mai na yabaki 1990, ka ratou taura veitaravi mai e dina ni kaukauwa na veiqati mai vei Suva Grammar ia e ratou dei vinaka tikoga na goneyalewa mai Sawani.
E a vovoleka sara me ratou mai sogota na nodratou qaqa veitaravi tiko mai na goneyalewa mai na Adi Cakobau o ira tou na laione ni Grammar ka ni ratou a liu tiko e na tuvatuva ni metali e na i matai ni siga ni qito.
Ia, e dreve na sasaga mai Grammar e na nodratou soli sele na goneyalewa mai na ruku ni veidakua e na nodratou vakaraitaki ratou tale ena i walewale kei an soli bula ka ratou dau kilai tani kina, oya e na karua ni siga ni qito.
Na goneyalewa daucici ni Adi Cakobau e na wasewase na intermediate o Elenoa Sailosi e a rawata rawa e 3 na koula (100 na mita, 200na mita kei na 4x100 na mita na cicivaki kuila).
E vakaraitaka o Sailosi ni ratou na rawata tale na qaqa ena yabaki mai qo ka ni ratou vakararavi tiko vua na vuni kaukauwa sa i koya na Kalou Bula.
E sa vakarautaki koya vakavinaka tale tikoga o Sailosi ni na veiqati tiko ena waswase ni Senior e na yabaki vou.
E na dua dian na bolebole levu vei au. E dua na veiqati vinaka e vakaraitaka na noqu i tokani o Sisilia mai na Saint Joseph Secondary e na yabaki qo, e kaya o Sailosi.
E sa na tovolea o koya me na rawata na i covi ni reveni karakarawa (blue ribbon) e na yabaki vou.
A vakaraitaki koya talega o Miriama Senokonoko mai na Adi Cakobau e na nona rawata talega e tolu na metali koula oya ena 400 na mita, triple jump kei na 4x400 na mita ka taura nai covi ni goneyalewa dau qito vinaka e na sotasota ni Coke Games e na yabaki qo.
Vei ira na gonetagane e rawata o Ratutira Narara mai na Marist Brother High School na covi ni gonetagane dau qito vinaka ka rawata e tolu na koula oya ena 400 na mita, 800 na mita kei na 4x400 na mita na cicivaki kuila ka tekia talega e rua nai sausau vou oya ena 400 na mita kei na 4x 400 na mita na cicivaki kuila. Ni da raica na sotasota ni Coke e na yabaki qo e sa qai toso cake tikoga na kena vakatagedegede.