E DUA na ka sa dau wewe ni gusui General Ali voli ga ena nona veivosaki kei iratou na kai Amerika, na nona vakataroga se gauna cava e sa na vakalutumi kina na bomu levu ka nanamaki tiko mai kina vakabalavu.
Eratou a yalataka na CIA vei General Ali ni dua na bomu levu ena vakalutuma o Amerika esa na solia kina na qaqa kina na qaqa kin a mataivalu vakayavusa. Sa mani yalataka talega kina o General Ali, ni gauna ga sa na lutu kina na bomu levu oya, e sa na vakatala e rauta ni 200 nona lewe ni mataivalu, era na kabakoro nona taqe taucoko ka ra na vanavana talega yani na nona dakainivanua.
E sureti iratou na kai Amerika o General Ali me ratou qai vaqara e dua na delana cere me rawa kina ni ratou na sarava vakavinaka nodra ivakarau ni vala na nona sotia ni veiyavusa, vakauasivi na vesu se vakamatei nei Osama bin-Laden.
Na bomu levu ka wewe ni gusui General Ali tiko oya sa ikoya na BLU-82 ka vakatokakayacataki me o daisy cutter, eratou yalataka na CIA ni ni na roqota yani ki na veiulunivanua na Tora Bora na waqavuka levu ni vala, na MC-130.
Na bomu oya e 15,000 na paudi (lbs) na kena bibi, na raba ni vanua e yacova na kena vakacaca e 400 na mita.
A se bau vakayagataki ga na daisy cutter ena kena vakalutumi ga vakadua ena dua na loma ni veikau loa mai Vietnam ka vukici kina na veikau loa oya me dua na vanua tautauvata ka cecelevu me ra ro kina e tini vakacaca na elikoputa ni Amerika.
Na vakanuinui taucoko nei General Ali sa vagolei vakadua ki na kena vakalutumi na bomu levu. Dina ni ra sa vakalutu bomu tiko e na veisiga ena loma ni rua na macawa oya na waqavuka lelevu ni B-52 bombers, eratou sa duavata na CIA kei General Ali, ni vakalutumi nei daisy cutter sa na veisautaka vakadua na ilakolako ni ivalu kei ira na Al Qaeda.
Dina ni sa vagolea vakadua nona vakanuinui o General Ali vei daisy cutter, e sega ni cegu o Kanala Dalton me taroga tiko vei General Ali se evei sara mada na vanua era sa yaco tiko kina nona lewe ni mataivalu ka me rawa kina vei ira na lewe ni Delta Force me ra toro volekati ira ka cakacaka vata kei ira.
Ia e veidusiyaki ga o General Ali ka sega soti sara kina ni mani matata na vanua era tiko kina nona sotia.
E na bogi ni ka walu ni Tiseba, 2001, sa yaco yani na itukutuku vei iratou na kai Amerika kei General Ali ni sa na vakalutumi o daisy cutter ena mataka ka tarava.
Na malaude nei General Ali e sega ni tukuni rawa ka kaya ni sa qai vakarau saravi qo na ivalu ni veiivalu kece ga e Afghanistan.
Ena mataka lailai ni ka 9 ni Tiseba, eratou sa curu ki tuba na kai Amerika ka vakakina o General Ali kei ira nona lewe ni lawalawa.
Era lai toka ravi e na yasa ni dua na vatu levu mera vunitaki ira kina mai vei ira na meca.
Sa osooso vakalevu o General Ali ena walesi ka vakaroti ira nona veimataivalu me ra vagalala tani mai na vanua a sa dusia taumada me na vakalutumi kina na bomu levu na daisy cutter. Vakalailai era sa raica e dua na ka loaloa lailai ni sa basika vakayawa mai na daku ni veiulunivanua.
Sa matau vei ira na ilawalawa na Al-Qaeda nodra raica na B-52 bombers, ni ra vakalutu bomu mai na 30,000 na fiti mai macawa, ia era sega ni kila na vakadomobula ni lewe ni ketei MC-130 ni davo no kina na gone o daisy cutter.
Era nanamaki taucoko ni na yaco e dua na kacabote levu ka me sakure na vanua taucoko era tu kina. Ia, e ka ni kidroa, ni sega ni vakakina, ka ra veitarotarogi tale se sa cava e yaco.
A sa lutu na bomu, ia, e tau e na dua tani na yasa ni ulunivanua ka yawa mai na takete.
Sa tubu na dra nei General Ali ni sega ni yaco na vakacaca levu ni bomu me vaka a namaka, qai kena i kuri ni a tau o daisy cutter ena dua na tiki ni vanua era toka mai kina nona sotia ka so vei ira a vuetaki sara kina.
Ia, e bau vakamarautaki General Ali kei ira nona i lawalawa nodrau muri yani e rua na B-52 bombers ka rau talaca nodrau i usana ena vanua sara ga a namaka o General Ali me tau kina na daisy cutter. Sa vuki tale mada na cudru me marau o General Ali, ka ra sa ladelade na nona sotia ni sa lutu donu na bomu ni B-52 bombers.
Sa qai kilai e muri ni dina beka ni cala na vanua e vakalutumi kina o daisy cutter e tauri rawa ena walesi ena vosa Vakaarapea na nodra sa domobula na i lawalawa ni Al Qaeda ena vakacaca ni bomu oya, e rogo na domo ni tagi kei na ulei ni yaco na vakatataro ki na so na qaravatu ka sa sega ni saumi mai vei ira na tiko kina.
Ni oti e 30 na miniti ena kena vakalutumi o daisy cutter,era sa tokatu yani ki na keba na lewe 40 na lewe ni Delta Force.
E tini taucoko na lenidrova ni Toyota lelevu era vakavodoki yani kina, o ira na lori oya era sega sara ni vovou, ia era voli e Amerika ka ra veisautaka na mekaniki ni Delta Forcena kena veigacagaca me lakova na loma ni vanua ka me vakayagataki talega e na i valu.
Eratou tokatu yani e liu na dauvakasasa lo (snipers), era vakaiyaragi vereverea ka ra kenadau ena nodra vanataka nodra dakai ka sega ni rogo.
Era dau lako vakailawalawa (timi), na timi yadua e dau tiko kina e rua se tolu ga na dauvana. Sa qai kena ikuri ko ira na dauvala (assaulters), ko ira ka ra dautoso vata vakailawalawa me ra vakacavara na qaravi ni dua na operation ena nodra vagalalataki na meca, vakarusai na ka kece e vakalatilati ka tauri bula se mate na takete.
Ko ira na lewe ni Delta Force era a sobu yani oya era sa vakaisulu kece tu vaka-Afghanistan, era kumi babalavu ka ra vakaivauvau e uludra, ia eso era vakaisala ena isala ni vanua o Afghanistan na (pakool).
Oqo ko ira na qarikau ni vala e vakanuinui kina o Amerika, e ubi ena isulu babalavu na imacamaca ni mavoa ni veiyabaki era vakasota kina kei ira na dauvakacaca ena veimatanitu e vuravura.
A lade mai tuba o General Ali tuba ka raici nona qoroqoro ena nona sa saravi ira na dauvala ni Amerika ni ra sa sobu yani ki loma ni nona keba. A lako vei General Ali o Kanala Dalton ka kaya:
E sega ni neitou bisinisi na Delta Force me keitou vakamacalataka se cava a leqa e na vakalutumi ni daisy cutter me vaka ko solia kece tiko kina nomu vakanuinui.
Au a sa kaya oti, ni sega soti ni mana na vakalutu bomu keveka ko dusi vakayawa tiko ga yani e ra qo.
Ena yakavi ga nikua era sa na cabeta kina na ulunivanua na noqu gone, ka vakatau vei iko se o via vakaivotavota e na i tinitini lagilagi ni ilakolako oqo se sega.
Nira talaca nodra i yaya na lewe ni Delta, eratou sa ciciva cake tale nai yatu e liu ni veiraravui ki na ruku ulunivanua ko irau o Satini Mejia Ironhead kei Satini Mejia Bryan ka sa tomani rau o Satini Mejia Jim ka a qai sobu ga yani.
Eratou lai vakaraica tale na veivanua a sa raica oti mai o Kanala Dalton e na siga kadua ka ratou qai mai biuta vata e dua na ituvatuva vou ni kena kabai na veiulunivanua lelevu na Tora Bora.
Ni dromu na siga, sa kacivi iratou na i liuliu ni veitimi o Kanala Dalton ka solia nona ivakaro: E rua na siteseni ni yadrai ni mataivalu na Green Beret erau sa dui vakatawana toka na tokalau kei na ceva ni veiulunivanua.
Ena wasei vakatolu na timi ni Delta Force, e rua me yadua ki na siteseni ni yadra ni Green Beret, na kena ikatolu me wawa me qai toso vata kei na kena vo (assaulters) ni sa vakadeitaki na vanua e tiko kina o Osama bin-Laden.
E na gauna e rau sa dau sota kina ena dua na yasai vuravura e rua na ilawalawa duidui ni mataivalu ni Amerika ka rau kilai tani ena vakarerevaki ni vakacaca e rau rawa ni cakava, sa itavi ni ilawalawa ka a liu me kidava se o cei vei rau e cecere cake. Dina ni mataivalu levu ka sa dede na Green Beret,
ia sa cuva ki na Delta Force ena gauna vakaoya ka ni ra tiko sara e cake na lewe ni Delta Force, ena totolo, kila, levu ni ivalu ni dauvakacaca era vakaitavi kina ka vakauasivi na iyaragi kei na misini vereverea e tiko vei ira. .
Ena bogi ga ni siga oya, era sa kau kina na i matai ni lawalawa ni Delta Force ki na siteseni ni yadra ni Green Beret e na tokalau ni veiulunivanua.
E rau liutaka na ilawalawa oya o Satini Mejia Durgan kei Satini Mejia Jester.
Na i karua ni lawalawa sa qai gole ki na siteseni ni yadra ki na ceva ena mataka ni siga ka tarava.
Ni vakaraici ira na kena vo (assaulters) o Kanala Dalton, sa raica e matanavotu na nodra sa via tikotiko vakaca ka ni ra sa via vala.
Sa cuva ga ka cavuta e dua na qaqa ni masu: Turaga, ni vakaraitaka mada ga na vanua e tiko kina o Bin Laden.
Ni ra sa tadu na imatai ni lawalawa ki na siteseni ni yadra e na tokalau e na bogi oya, eratou sa solia sara na i liuliu ni matayadra ni Green Beret vei rau o Satini Mejia Durgan kei Jester me rau sa veiliutaki.
E a vaka talega kina e na siteseni ni yadra ena ceva e na mataka ni siga ka tarava.
Ko ira na Green Beret e veiliutaki kina e dua na Turaganivalu (Major), ia ko iratou na Delta e liutaki iratou e dua na satini mejia.
Dina ni ra a qai kudruvaka na veisolisoli oqo ko ira na iliuliu ni Green Beret mai Amerika, ia eratou sega ni vinakata na lewe ni Green Beret mai Afghanistan me ratou vakamaduataki ke ra sa vakasota kei iratou mai na Delta Force ka ni ra na sega ni rawati iratou na ilawalawa lailai oya.
Ni ratou sa debe ga na Delta e na siteseni oya, eratou sa vakadeitaka ni sega ni laurai vinaka ekeya na vanua era tiko kina na meca kei na vanua era tiko kina na lewe ni mataivalu nei General Ali.
E rui bibi me matata vinaka na tikina oya, baleta sa tautauvata tiko nodra isulu na dauvakacaca na Al Qaeda, ko ira na mataivalu vakayavusa nei General Ali ka vakakina ko ira na lewe ni Delta Force.
E levu na mate e yaco tiko vei ira na kai Amerika kei na ilawalawa nei General Ali, e vakavu tiko ma na kena sega ni kilai rawa mai vei ira na pailate dauvakalutu bomu mai macawa na duidui ni meca kei na nodra ito ena vuku ni sa tautauvata tiko nodra isulu.
Sa kerei nomuni veivosoti, e dua na itaba a tabaki yani ena macawa sa oti, e rau laurai tiko kina e rua na sotia ni Amerika ka volai tiko ni rau lewe ni Delta Force.
Au via vakadodonutaka ni cala na itaba kei na ivakamacala oya ka ni o ira na lewe ni Delta Force e sega ni ra dau vakaunifomu ni mataivalu, ka sega ni laurai na matadra vakavo ga na siga e vakataqari kina nodra metali.
Ko ira na lewe ni Delta Force era a talai ki Afghanistan era a vakaisulu kece ni vanua oya, ka ra a se vakamatautaki ira ga yani ena gauna era se tiko kina mai Amerika.
Oya tale ga na vuna era a uasiviti ira kina na veitabana ni mataivalu ka ra a soli vukivuki e matai Donald Rumsfeld, na Sekeriteri ni Valu e Amerika ka ra digitaki kina me ra lai vakasaqarai Osama bin-Laden.
Ena macawa mai oqo, eda sa na curuma kina na katakata ni veiraravui kei na dua na ka matalia a yaco kina.