ENA macawa sa oti eda vulica kina na nodrai vakarau ni kana na wekada na Idia kei na ka eda rawa ni cakava ke ra sa mani sureti mera mai kana se tiko talega ena noda soqo me vaka na Siga ni Sucu ena vula o Tiseba.
E dau dredre mera lakova yani na noda soqo ni marau se somate dina ga ni vinaka tu nai vakarau ni noda veimaliwai kei ira baleta nira leqataka de ra mani vakani ena so na kakana ka vakatabui ena nodra lotu mera kania.
Vei ira na Lotu Islam e tabu vei ira mera raica mada ga na vuaka, na kana sa qai yawa sara, baleta ni tukuna tiko na nodrai Vola Tabu na Quran, na ka vata ga e tukuna tiko na nodai Vola Tabu na Lotu Vakarisito.
Na Veiyalayalati Makawa, ena nona vakaroti ira na Isireli na Kalou mera kakua ni kania na manumanu duka me vaka na vuaka.
Oqo e kaya beka ga na Kalou ni kila tu de na mani tauvi ira na Isireli eso na mate lelevu ni sega tu na vuniwai se valenibula ena gauna oya, ka ni ra tiko voli ga ena lekutu.
Ia me vaka ni sa volai tu, era sa mani okata kina na Lotu Islam me haram se dukadukali na manumanu vakaturaga qo na vuaka.
Vei keda na Lotu Vakarisito, me vaka ni manumanu vakaturaga ka dau kedra ga na turaga se cabori me magiti vakaturaga, me vaka ni sa tiki ni nodai vakarau ni veiqaravi vakavanua.
Eda sa okata kina me manumanu savasava na vuaka, dina ga ni kau mai na vanua duka ka duka talega na kena i rairai.
Oqo na vuna era vakatabuya kina na Lotu Islam na kana vuaka baleta ni manumanu tawa savasava ena mata ni Kalou.
Kevaka e sa lomada me da sureti ira na Lotu Islam ki na dua na noda soqo ni marau se somate, ia meda qarauna na vanua eda vakamate vuaka kina, vanua e saqa kina, nai yaya me vaka na kuro kei nai taki sei uli e vakayagataki kina kei na vanua e vakarautaki kina na kakana.
Kevaka mada ga e raica o koya ni saqari tiko na vuaka ena vanua se sue e saqari tiko kina na veikakana tale eso, e sa na ka ni rarawa ni sa na biuta na soqo ka lesu ki nona vale.
E tabu ena lotu Islam me volekata mada ga na vanua e vesu tiko kina se vakamatei kina na vuaka, ka vaka kina na toro ni vuaka.
Sa dodonu me da vakavakarau kina kevaka eda veisureti, me da qarauna na vanua e vesu kina se vakamatei kina na vuaka, me kua ni laurai levu tu se mera kila ni dou vavia vata na magiti ni soqo kei na vuaka.
Vei ira e sa na okati na lewe ni lovo taucoko me haram ka na sega ni vakayagataka e dua na ka.
Sa rawarawa cake vua me gunu ti ga se kana rourou ka ca me vakadukadukalitaka na yagona.
Dina ga ni vakatarai mera kana bulumakau na Lotu Islam, e sega ga ni rawa mera vakayagataka vakaveitalia.
Oqo ena kena vakamatei na bulumakau ena kenai valavala vaka-Islam.
Ka vakatokai me halal, na mataqali veivakamatei ka kerei kina na Kalou mera vosoti nira sa vakarau labata e dua na ka bula.
E dau vesu na yava ni bulumakau, vakadavori, moici cake nona qavokavoka, vagunuvi ena wai, sava na domona, qai musu ni cavuti tiko na kena masu.
Kena i balebale, ena sega ni vakayagataka na bulumakau dou vakamatea me ka ni nomudou soqo ke sa mani sureti yani.
Vei keimami ena yasayasa vaka-ra, vakabibi e Ba, keimami dau kerei ira mera tala mai e dua na kena dau ni vakamate bulumakau me mai vakamatea, me rawarawa vei keimami ka rawarawa talega vei ira na kena vakayagataki.
Keimami dau cakava oqo ena neimami soqo ni vakamau kei na somate.
Na soqo bibi e rua ka dau dredre mera kaya kina na sega, ni levu vei ira era sema vakadra tiko kei keimami.
Ka vakabibi ni tautauvata tiko ga na noda vakabauta.
Na mataqali valavala ni vakamate manumanu vakaoqo e dau caka talega ena veimataqali manumanu tale eso me vaka na manumanu vakamarama oqo na me kei na sipi.
Era dau kana kari-me vakalevu na Lotu Islam, ka ra kaya kina ni sawad [maleka] duadua na kari-me, oi au we!
Vei ira na Lotu Hindu, e tu talega eso ka vakatabui vei ira na kana vuaka, vakabibi o ira na Brahman na kawa ni bete vei ira.
O ira oqo e dau yacadra na Sharma, Shandil kei na Maharaj.
Na noda Minisita ni Bula e Brahman ka tabu kina vua na kana lewe ni manumanu vakabibi na vuaka kei na bulumakau.
Au wilika tiko ena pepa ni tiko voli qo mai Vanuabalavu kei na veiyanuyanu lalai mai Lau.
Au kerea ga ke rawa ni rokovi na nonai vakarau ni kana. Ia, ke Lotu Vakarisito, sega ni dua na ka.
Ke sega, na ika sara mada ga kei na sasalu ni waitui ena sega ni vakayagataka, kakana draudrau ga.
Na vuaka kei na bulumakau sa qai yawa sara.
Na lewe ni manumanu ga ka vakatabui vei ira na Lotu Hindu taucoko na bulumakau ka so na vuaka.
Kena vo kece e rawa mera vakayagataka vakavo ga o ira na Brahman.
Tiko ga na siga mera kana lewe ni manumanu kina ka tiko na siga mera tabu kina-aya ena Siga Tusiti kei na Vakaraubuka.
Ni qai namaka mai na kenai kuri