OQO na i kuri ni vakamacala ni Yavusa Kubuna me vaka e da sa wilika taumada tiko e na macawa sa oti, ka vola ko Ratu Isoa Natuituba. Ni wilika sara yani.
Mai Verata e a soko ko Vueti ki Moturiki ka laki vaka yacana na delana mai Nalami me yacana ko Uluibau, mei vakananumi kei Bau, na yaca oqo ka vaka yacani kina na suvasuva nei Vueti mai Nakauvadra - na yaca ka ra bulia na turaga ka ra laki vala kina. Oti sa qai lesu mai ko koya ki Kubuna. Dede vaka lailai na nona sa mai tiko mai Kubuna sa qai lewa mera lako mai na Qali Vakabau ka ra toka laivi yani mai Nasau.
Nira sa yaco mai na Qali Vakabau sa mani lewa ko Vueti me ra laki vakaitikotiko i na i kacikaci e voleka ki Nalivisou ka nodra i liuliu tiko kina ko Rawalai.
Sa oti kece oqo sa qai bale ko Vueti, sa Ratu mai Bulu na Roko Tui Bau, e dede vakalailai na bale oqo nei ratu mai bulu, era sa buti Kubuna na Vusaratu, Tui Kaba kei Navusaradave ka ra laki vakoro vakamataqali e na veivanua.
Kei na yanuyanu ko Bau e ratou lako kina na mataqali ka dau gonedau voli e a qai mai vakayacani e ke na nodratou dui tokatoka me baleta na tiki ni qele e ratou mai dui toka kina, a ya ko Butoni, ka kena i balebale na buto ni vanua ka yacadratou talega na kai Raviravi se Rarakososo, ni a lailai sara na tiki ni vanua e ratou a mai toka kina ka ratou qai vakasasaga me raba.
Ena gauna vata oqo sa buli kina ko Roko Durucoko mai vei ratou mai Nanukurua (Tui Kaba) me Vunivalu. E ratou toka kina mai Nanukurua ka tiko ko Ratu Tauriwau na Roko Tui Bau mai Namuka ka ra tiko na Tui Kaba mai Levuka, ka ra tiko mai Sawainaqalo kei Nubulevu ko Nadakeke (Vusaradave) ka ra tiko mai Raralevu kei Burekanadruku ko Navitimaiwaga (Vusaradave) ka ra tiko mai Naisausau kei Nauaua na Rokowiri (Vusaradave) mai Sawainamosi na Cokadi (Vusaratu).
Sa mani sega tu kina na i sosomi kei Vueti e na i tutu vaka Roko Tui Bau me ra bulia vata na Yavusa ko Kubuna, ni ra sa tatawasewase tu.
Ke Roko Tui Bau sa tukuni oti ko Ratu Tauriwau, e ratou a bulia ga mai Namuka na Vua-ni- ivi (Vusaratu).
Na turaga oqo e ratou a qai mokuta na matanivanua mai Savai, ni dau vakasaurarataki ratou. Sa qai vakatokai voli kina e muri me yacana ko Ratu Tauriwau Baleisavai.
Ni sa mate ko koya sa qai buli tale mai Namuka ko Veikoso me Roko Tui Bau, ni sa mate na kena i sosomi ko Ratu Lele.
E Roko Tui Bau tiko na turaga e yaco na toki mai Bau.
E mate mai Muai ko Rokoduricoko. E ratou sa qai toki na turaga ni Naivisau ka ra mai vakatawai Muai na Qali Vakabau.
E a buli me Vunivalu ko Ratu Buinivuaka Nailatikau mai Naivisau ka sa koya ka qai lewa me toki ki na yanuyanu ko Bau, oqo e na yabaki 1550.
Ni ra sa buti Naivisau na turaga me ra toki ki Bau, era a biuti Muai talega na Qali Vakabau ka mai tawani Naivisau.
Ni namaka na kena i kuri ka tarava.