E MARAU na vanua o Delaimakotu, marau o ira na lewena ka marau talega na draki e na siga a tadu yani kina na matatimi qaqa ni kirikiti ni Moce ka a rawata na lagilagi ni LICI Crompton Cup mai vei Suva Warriors e na fainala e na sotasota ni Siga ni Mate.
E vakaraitaka na turaga na Ramasi ni vanua o Delaimakotu o Setareki Malupo ni sa dua na ka nodra marau e na kena kau mai na bilo.
Keimami sarava toka na nomuni qito mai koronivuli vuli.
Au sa vakavinavinaka vakalevu e na vuku ni vakatatabu. Ni vakayacori na Lotu ena Siga Tabu, keimami dau masulaka na timi.
Au sa vakavinavinaka talega vei iratou na qasenivuli ni Moce District School, tubutubu kei kemuni ragone e na nomuni veitokoni, e kaya o koya.
Ia, e na kena tuberi e dua na kamunaga me i soli ni bilo mai vei iratou na turaga ka ra veikau yani e Suva, e voqa kina na vosa ni sa vakanuinui vinaka e na veiyabaki mai qo.
Sa na vakarau tiko o Suva e na yabaki mai oqo. Cibi o ira na kai Delaimakotu e Suva. Na qaqa oqo e sega walega ni rogo ena noda vanua, ia, ki vuravura raraba.Ia, sa vakaraitaki sara talega e loma ni rara e Nasau ka vakayacori kina na soqo e na dela ni buturara simede se piji ni kirikiti na tatau nei jeameni ni lewei Moce e na vanua ni cakacaka e Viti levu o Naibuka Vuli.
Na vanua o Delaimakotu me lotu sara vakaukauwa.
Ratou a veikau tiko yani e Suva e lewe va na qase o Joeli Lawai, Aminio Lagoia, Sega vata kei Jope Mocevakaca yabaki 76.
Oqo e sa qai matai ni gauna e na kena i tukutuku ni veigauna ni qito kirikiti e Moce me rawati ka kau sara talega yani ki yanuyanu na bilo oqo.
A sasaga vakarua na waqa ka veiusa tiko na MV Lady Sandy ka suka lesu tale ki Suva e na Vakaraubuka na i ka 20 ni Epereli e na kena sa kaukauwa na ua ka vaka kina na cagi.
Na i karua ni sasaga e a qai vakayacora e na siga Moniti, ia, a bau dua na sasaga ka vakilai na sakure ni waqa e na ua lelevu a sotava toka e na nona sa tekivu coqa toka yani na mata ni cagi.
Sa namaki tu me i matai ni kele e na yanuyanu o Vanuavatu e na va na kaloko, ia, me qai caka na vakasobu ni qai kacabote na rarama.
A vakaraitaka toka o Cakacaka Sau, yabaki 40 ka qase duadua tiko vei iratou na cauravou lewe ni timi ni kirikiti ni Moce ni oqo e dua na i lakolako ka na tawa guilecavi rawa e na i tukutuku ni veigauna ni vanua o Delaimakotu.
Keimami a vakatatabu tiko mai, ka keimami talaci sara talega mai vakavanua e na vuku ni vakanuinui me rawati na qaqa ka kau yani ki vanua na bilo, e kaya e na matadredre.
Oqo e sa i ka 15 ni yabaki na kena mai tovolei tiko me rawati na qaqae na sotasota ni kirikiti e dau vakayacori e na veiyabaki.
Ia, na kena e vakayacori e na yabaki oqo e duatani sara ka vaka me laveta cake na kena taleitaki nira yau mai vakalewe levu na veitokoni mai na veiyanuyanu e Moce, Kabara, Komo, Oneata kei Namuka-i-Lau.
A namaki tiko me vakadodonu ki Vanuavatu kei Moce na waqa, ia, e na vuku ni draki ca sa mani gole vaka ki Lakeba me laki vakaruru kina.
Ia, sa dina sa vuku na Kalou ni vunia na ka, ni a dodonu ga me liu taumada ki kea me vaka era a nanamaki tu mai kina na i sema vakadra ki na vanua o Delaimakotu mai na Vuanirewa.
Ni gauna ga sa rogoci kina e Tubou ni sa kele no na waqa, sa ra sega ni bera na lewena e na nodra sa maqusa na cavu na dalo ka moku e tolu na vuaka ka vakarautaki na kamunaga me sa lakovi ki waqa na bilo me laki soqovi yani ki vanua.
A vakayacori na kena veiqaravi vakavanua ka cecere sara e na vuku ni sema ni veiwekani vakadra ka vakavanua.
Ratou vakasota na bula yani na cauravou lewe ni timi kei iratou na turaga ni Moce e ratou veikau tiko ki vanua.
E na mataka lailai ni siga Vukelulu sa mua na i tosotoso cake vaka ki Oneata ni bera ni qai mua yani ki Moce.
Ni qai basika yani e ucuna na waqa e na daku ni cakau sa vakarewa no na kuila ka ra sa tekivu veitau mai vanua na waqa na fibre. E cecebuya na kuila e na loma ni waqa era mai veiwaraki - na kuila masi ka kesavi vakamatai ka kilai tani kina na yanuyanu o Delaimakotu.
E 13 taucoko na levu ni waqa era veitavaki e wai mera vodo kina na timi kei ira na veitokoni ka usani sara talega yani kina na i yaya. Mai vanua era veiwaraki na vanua e na vuku ni rova se cere me na cicivi yani e na dela ni mati levu. A via lolobo tokana matasawa se sopesope ka mai suruta na vusi na noqu via tovolea meu veitau ki vanua. Sega ni vakamelei rawa o ira na gonevuli ni kalasi dua ki na walu e na nodra i sulu ni vulu na drokadroka kei na vulavula e na nodra sa kailavaka toka: Go Moce go!
Ia, o ira na marama era yadua na kuila masi e baravi ka cecebuya no e na nodra sa vakalukalu kei na kaila.
Era vakasulu masi taucoko na lewe ni timi ka vakakina ko i rau na vakailesilesi ni tabana ni tukutuku.
Sega ni vakamelei rawa na veikauwaitaki kei na veiqaravi mai vei ira na lewe ni koro.
Na vavi madrai vakamataka lailai, kei na nodra maqusa na marama e valenikuro e na vakasaqa ka ra vavavi na cauravou kei na turaga. E wai e tawa na noke ni qoli ka sega na vosa me vakamelei kina na sasalu ni waitui na lairo, vasua kei na ika.
E na kena bogi e qai kacabote na vale ni Tikina ni sa carubi kina na mata meke bula nodra na marama ni Moce ka salavata kei na kena veivakataubeni e na loli vakau kei na i sulu.
Kaya o Ropate Maiwiriwiri Tuioni, yabaki 85 ni dua na ka na levu ni nodra luvuci e na marau.
A se vakayacori ga vei ira na Gone turaga na Tui Nayau sa bale na veiidavaki vaka oqo e Moce, ia, e sa qai vakayacori tale oqo - vei ira na luvei Delaimakotu e na vuku ni qaqa sa mai rawa, kaya o koya.
E na i ka tolu ni siga, e na Vakaraubuka sa oti e sa qai tayabetaki ki na koro o Kototolu na bili kei ira na lewe ni timi ni kirikiti ka salavata na kena polutu me vaka era kilai tani kina na Yatu Lau.
Sa i koya oqori na nodra sere masu ni vakavinavinaka vua na Kalou Bula.
E na kena bogi era osota tale yani na loma ni vale ni soqo mera soqo sara talega ni veitalatala ni bera na vakavodo tale e na tini na kaloko e na bogi ni sa wawa koto mai wai na MV Lady Sandy me sa mua lesu tale mai ki Suva na i tosotoso.
Sa malo vakalevu, Delaimakotu, a veikauwaitaki!