E VAKAUTA mai na i soqosoqo lotu Wesele mai Peritania ki na lotu Wesele e Viti e 10,000 na paudi mera vukei kina na vei i tikotiko ka ra vakaleqai e na ualuvu.
Oqo e na kena tarai Viti na ualuvu levu e na i mua ni vula o Maji, ka a se sega ni se bau sotavi vakadua na levu ni vakacaca e kauta mai.
E sega ni vakamacalataki rawa na levu ni veika e vakacacani, ia e ka ni rarawa ni mai kacivi kina e vitu na bula ni lewenivanua ka vakaleqai talega na i vurevure ni bula kei na udolu na veivale ka ra vakaleqai. Era sa veivuke tiko na i soqosoqo lewe ni lotu e Viti kivei ira na veimatavuvale ka ra vakaleqai oqo e na kena soli na i sulu, kakana, yaya ni kana ka vaka talega kina na veika ni veivuke tale e so ka ra dodoliga kina na lewe ni lotu.
E na yasayasa vaka-Ra kei Viti, oqo na karua ni waluvu e na yabaki oqo ka vu mai na uca bi ka sa kau tani kina bula ka vakacacani talega na nodra veivale e udolu na lewenivanua, e kaya ko Julia Edwards, e dua na i tokani vaka lotu.
E dua talega na ka oya na nona sa vuki totolo sara tiko na lotu me ra vukei ko ira na gadreva dina na veivuke.
Ka keitou sa vakavinavinaka kina yalo ni veivuke mai vei ira na lewe ni lotu e na kena sagai me vakacokotaki na nodra bula kei na i vurevure ni veika me ra bula kina ka sa vakacagau tiko na veivuke ka ra sa vakaitavi sara tiko kina vakalevu na i tabagone. e kaya o Edwards.
Na veivuke oqo mai na British Church World Mission Fund, me na vukei ira na i talatala e na kena tomani tiko ga na veiqaravi e na vanua ni veqaravi e ra vaka i tavi kina. Era vakaleqai sara talega na veivuvale vaka i talatala me vaka ni vakacacani talega na nodra i teitei ka i vurevure ni kedra. Oqo e kauta mai na rivariva bi e na nodra vakani na matavuvale kei na kena sotavi na gagadre ni lewe ni vanua.
Na soqosoqo lewe ni lotu Wesele e Viti era sa tekivutaka oti tiko na nodra veivuke kivei ira e ra vakaleqai na nodra bula e na waluvu oqo e kaya ko Christine Elliot, na i vakalesilesi ni Valenivolavola ni lotu mai Peritania.
Keimami sa nuitaka ni na vukei ira sara vakalevu na veivuke oqo e na nodra tomana tikoga na kaci ni Kalou kina nodra bula e na nodra vakaisulutaki ko ira era gadreva kei na nodra vakani ko ira era via kana, e kuria ko Elliot.