ERATOU sa vakarautaka tale na bisinisi nei Jone Soko ena Flea Market, e Suva me baleta na nodratou veivuke ena caka somate vei keda na i Taukei, oya ni rawa ni na veisausaumitaka na i sau ni yaya ni somate kei na bulumakau.
Ena nodratou vukei keda na lewenivanua me baleta na noda rawa ni sauma kece na veika me baleta na nodra sa talaci na wekada era leqa, oya na kena rawa ni saumi ga e $300 me baleta na pakete ni kena voli na kisi ni mate kei na kena lori, na kena vo ni $200 e qai dau veisausaumi ena kena kau mai na i yau vaka- Viti kei na ibe, me rawa ni vakacavari kina na $500.
Oya me sa veisau ga vakaoya, me sosomitaka na i lavo.
E kaya o Soko ni dua talega na mataqali veivoli eratou sa vakarautaka tiko oya na kena veisautaki na gatu ni Toga kei na tanoa ni yaqona eratou voliataka tiko. Eratou rawa ni veisautaka talega na yaqona mamaca kei na tanoa e sa tu rawa tu ena nodratou sitoa.
Na caka bisinisi ena gauna oqo, oya me da sa kila vinaka ga na i yau bula e tu vei keda na i taukei ena kena rawa ni vakavurea na i lavo kivei keda.
Oya na noda na vakadikeva ga vakavinaka na noda i vakarau ni bula, e kaya o Soko.
Keitou qarava na veibulu sau lailai duadua.
Ni o sauma ga na kisi sa lako vata na vitu na ka oqo: na lori ni mate, na i ubi ni kisi (lace), na palasitika, na kena senikau, na lokoloko, na kena ukutaki na lori mai vale ni bula i vale, mai valeni lotu kina i bulubulu, e kaya.
Na kena i kavitu na pakete yasi pouta, oya na i vakaboi ni kisi.
E va na pakete e ratou vakarautaka o Jone Soko mai na nodratou bisinisi ni veivuke ni somate vei keda na i taukei:
Na kena e tiko ena $500, kei na $600, na $700 kei na $900.
Kevaka mada ga e bera na i lavo mai valagi se mai na baqe, e sa na caka ga na veibulu, qai ko ni rawa ni sauma malua, ko ni na vakabula kina e rauta ni $180 mai na veika e ono eratou solia wale tu.
Oqori na veivuke vakaitaukei.
Ka me cau ni kabani oqo kina veivuvale taucoko sara ena yasana e 14 ena noda Viti raraba, e kaya.
E dua talega na tabana ni veiqaravi eratou sa vakayacora tiko oqo oya na kena volitaki na kisi ni susu oni, ena i sau e rawarawa sara. Eratou vakarautaka na kisi ni oni, ka sau lailai ni da vakatauvatana ni da laki volia tale e dua na vanua. E dua talega na i walewale ni veivoli e ratou cakava oya me veisautaki na gatu ni Toga kei na tanoa eratou sa volitaka tiko. Se na yaqona mamaca e rawa ni veisau kei na tanoa. Ni laki sikova sara e dua na nodratou sitoa ena Flea Market.