E VAKARAITAKA e dua na parofesa ka kena dau ena buturara ni vuli, ni sa kena gauna oqo me ra sa duavata ka yalovata mai kina na i soqosoqo ni unioni ena noda vanua.
E tukuna o Biman Prasad, na parofesa e na Univesiti ni Ceva ni Pasifika ni na dua na i soqosoqo kaukauwa kevaka erau sa sema vata na i soqosoqo ni qasenivuli i taukei kei na i soqosoqo ni Fiji Teachers Unioni.
Tukuna ni sa kena gauna talega me rau sa na sema vata ka cakacaka vata na unioni lelevu na Fiji Islands Congress of Trade Union kei na Fiji Trade Union Congress.
E vakaraitaka talega ni dodonu me na solia na galala na matanitu oqo en vuku ni lawa e sa biu tu mai oqo, ka vakataotaka na noda via sota ena yalo e galala kei na noda veitalanoataka na veika me rawa ni toso kina ki liu na noda vanua.
Tukuna o Prasad ni kevaka e vinakati na toso ki liu kei na kena vinakati na tiko vinaka, e dodonu me na soli na galala vei keda na lewenivanua, ka me kua ni kau mai na lawa me na mai sogolati keda tu. E veivakauqeti o Prasad vei ira na qasenivuli me ra na vakaitavi ena kena tarai ka buli cake e dua na noda Yavu ni Vakavulewa vou.
Ena nodratou tuvatuva vou talega na i Soqosoqo ni Qasenivuli i Taukei, tukuna o Merewairita Moci na peresitedi ni soqosoqo ni ratou sa tauyavutaka tiko e dua na nodratou bisinisi ni volitaki komupiuta veikauyaki, se na laptop oqo me vukei ira na qasenivuli ena nodra veiqaravi.
Kei na i yaya ni vuli, kei na i yaya e ra gadreva vakalevu na qasenivuli kei na valenivolavola eratou sa tekivutaka tiko na i soqosoqo.
Esa mai dola rawa talega na Naivakananumi Apartments mai Delainabua ka ratou cicivaka na i soqosoqo ni qasenivuli i taukei.
Vinaka vakalevu na cola i vua kei na tutaka na i soqosoqo ni Qasenivuli Taukei, e kaya o Moci.
E vakavinavinakataka na nodra dau solia tu na nodra gauna kei na nodra i yau kei na veitokoni na komiti era sa mai sivi yani kei na nodra vuvale ena kena mai cicivaki vinaka tiko na i soqosoqo.