ENA macawa sa oti, eda wilika tiko kina na kena sa vakadonuya na kebineti me sa na vakalawataki se sa na vakadonui vakalawa na tiko veibutakoci.
Oqo na nodrau sa veivinakati e dua na yalewa kei na tagane, ka rau sebera tu ni vakamau vakamatanitu. Ka levu na kisi vakaoqo, era dau sega talega ni vakamau tu vakalotu.
E na lawa esa vakatara oqo na matanitu e veisemati ga kei na Lawa ni Vuvale se na Family Law Act.
Tukuna na Vunilawa, o Aiyaz Sayed- Khaiyum ni lawa oqo ena vukei ira na tiko veibutakoci me ra wasea vakatautavata na veika e rau taukena vakaveiwatini kevaka erau sa mani veibiu.
Oqo me vaka na lawa e dau vauci ira era vakawati vakamatanitu, oya ni kevaka erau sa veibiu, ena qai tiko na dodonu mai na mataveilewai ena kena wasei na veika erau taukena vata me vaka na vale, kei na i yau cava ga erau taukena vata.
Tukuna o Khaiyum e liu, e dau sega ni yaco tu na veika oqo, ia oqo e sa na wasei vakatautauvata na nodrau dodonu na veiwatini, ni sa mai yaco tale na bula kavoro.
Ia mai na yasana vakalotu, eda kila vinaka ga na cava meda cakava me rawa ni savasava tiko ena mata ni Kalou ka vakalougatataka talega na Kalou na vuvale.
Ni da lotu tiko, ena soqosoqo lotu va- Karisito cava ga, kevaka drau sa veitalanoa tiko kei dua na nomu i tau, ena caka kece na kena veiqaravi vakavanua, drau na laki vakamau rawa vakamatanitu, vakalotu, sa qai laki tiko na tiko vata.
Oya na laki tukuni rawa vei ratou na vuvale nei yalewa ni drau sa veitalanoa tiko na veitau, caka sara na i duguci, sa qai mai caka rawa na nodrau vakamau vakamatanitu, ni bera ni rau na laki vakamau vakalotu, me rau sa na qai laki tiko ena nodrau vale me rau na tekivutaka e dua na nodrau vuvale vou.
E dua na yasana ni da raica oqo, ena vakabulabulataka na kena sa na yaco ga na veidrotaki, ka na sega ni na vakabibitaki na bibi ni yavu ni vuvale e a tekivuna na Kalou mai na i Vakatekivu.
Ena levu na gone era na susugi cake mai na bula oqo, ka na vakatara na bula ni vakawati, veibiu.
Ena sega ni levu na vuvale vinaka era na susugi, eda sa na susuga tiko e levu na vuvale kavoro, kei na vuvale e sega ni vakabibitaki kina na yavu dina va- Kalou ni vuvale, e tiko kina o Tama, o tina kei ira na i solisoli.
Sa dina sara na vosa ni i Vola Tabu: Kevaka esa sega ni tara na vale ko Jiova, era na oca wale o ira era sa tara.
Na lawa vukici ni matanitu, na Family Law (Ammendment) Decree 2012, ena levu cake na leqa ena vakavurea.
Oqori na ka e vakaraitaka o Nai Talatala Iliesa Naivalu, e dua ka a taura tu e liu na i tutu vakaivukevuke ni Vunivola ni Tabacakacaka ni Bula Raraba ni Lotu Wesele, ni bera ni lesi mei Talatala ki Malevani, Ositerelia. Na lawa oqo sa soli kina vakatautauvata na kaukauwa ni taukeni ni i yau nei tagane vua na yalewa ka rau tiko voli vakatevoro (sega ni vakamau).
E kaya o Nai Talatala Naivalu ni vakarerevaki dina na i tukutuku vakamatanitu e tukuni kina ni sa rui bibi me soli na kaukauwa kei na dodonu taucoko ni taukeni ni i yau nei tagane vua e dua na yalewa e tiko vakatevoro me vaka ga na kena e dau soli vua e dua e vakamau.
E vakuria o Nai Talatala Naivalu ni oqo sa dua na cala levu ka ni sega vakadua ni rau tautauvata na tiko vakawati (vakamau) kei na tiko vakatevoro. E vuqa na matanitu era bulia na lawa vakaoqo, ia me kakua sara ni tautauvata se yacova na lawa e vauci ira na vakamau, ka ni cecere duadua oya.
Na vakawati (vakamau), e i naki Vakalou ka sa yavutu ni bula vakaitikotiko ni dua na vanua. Oqo na yavu e vakotora na Kalou me vakadeitaki kina na bula ni dua na umatamata e na dua na vanua. Na vakawati e sotava kina e dua na tagane kei na dua na yalewa na taucoko kei na vakaibalebale ni nona bula, nona marau, nona veitokani kei na nona vakacegui ka vakalougatataki talega kina.
Na matanitu e tutaka vakalawa na vaqaqacotaki ni bula vakawati e matanitu qaqa ka kalougata. Ni da sa bulia eso tale na i vakarau ni tiko e veisaqasaqa kei na loma ni Kalou, eda sa sureta tiko ga na veimataqali leqa ki na noda vanua.
E kaya o Nai Talatala Naivalu ni sa rui bibi na lawa oqo baleta e tara vakalevu na bula raraba (social), na dodonu se cala ni kena yavu (moral) ka vakakina na noda veiwekanitaka kei na noda rai vakalotu (theological) na lewenivanua.
E vakuria ena nona kaya ni vakusakusataki na vakadonui ni lawa oqo ka rairai a rogoci ga kina na domodra e dua na i wase lailai sara ni lewenivanua ka ra dau tutaka na dodonu ni marama. Na kena rui bibi na tiki ni lawa vakaoqo, e dodonu me a rogoci taumada na domodra na lewenivanua raraba, ni bera ni qai kau cake ki na Palimedi me veiletitaka, veisautaka ka biuta vakalawa.
Kevaka me a muri oya, e rawa ki na veisoqosoqo lotu Vakarisito me ra vakaraitaka na yavu ni nodra vakabauta kei na ka era tutaka ena vuku ni lawa oqo, a kaya o Nai Talatala Naivalu.
E vakuria o Nai Talatala Naivalu ni vica na leqa e raica ni na yaco vakaidina ena kena sa taurivaki na lawa oqo:
Matai, sa na vakabulabulataka cake na tiko vakatevoro (tawa vakamau); karua, ni da sa na vakuria tiko ga na vakayacori ni i valavala ca (kei na kena i sau vei keda); katolu, sa na qai tubu ga ki lagi na leqa kei na kavoro ni vuvale ni na lewe levu era na digitaka me ra biuta na watidra ka lai tiko vakailoa kei na dua tale era vinakata.
E dodonu me da na dabe dei ena vuku ni yavu ni vuvale e vinakata na Kalou.