Esa dua na ka na nodra marautaka tiko na lewenilotu Wesele na kena sa soli vei ira na galala mera bose vaka i wasewase, se na Bose Vakayabaki.
E na vica na wasewase lelevu ena wasewase e loma era sa tekivutaka ena macawa oqo na nodra bose.
Ena wasewase o Suva, e vakayacori tiko e Jupili, na wasewase o Nabua e vakayacori tiko ena koro o Nabua, kei na wasewase o Davuilevu mai na Tabacakacaka o Makoi.
E ra sa vakavinavinaka talega ni sa soli na galala me baleta na veisisivi sere, me vaka era sa vakavakarau tiko kina na lewenilotu e Suva kei Nabua.
Na soqo ni lotu vakaoqo e sa mai sega tu ni vakayacori ena va na yabaki sa sivi ena kena tiko na duidui mai na matanitu se na matanitu vakaivalu kei na veiliutaki mai vei ratou na Lotu Wesele.
Esa vakavinavinakataki ena vuku ni loma vinaka kei na veivakabauti mai na Tabacakacaka ni Ovisa ena kena soli na galala vei ira na lewenilotu mera qarava ena galala na veika me baleta na tubu ni lotu ena noda vanua.
E vakaraitaka talega na i vukevuke ni Vunivola Levu o Talatala Tevita Nawadra ni ratou sa vakavinavinakataka tikoga na tabana ni lawa ena kena sa soli tiko na veivakadonui kei na galala kina Lotu Wesele ena kena qaravi ena yalo e galala kei na marautaka na cakacaka kei na gacagaca ni veiqaravi ni vakatetei ni lotu i Jisu.
E sega talega ni ka rawarawa kina lotu na nodratou vosota toka mai na dredre ni kena sega ni vakayacori na cakacaka ena yalo e galala.
E na yabaki sa oti, na kena mai sega tale ni vakatarai ena i ka 11 ni aua me daro tale na Bose ko Viti, esa dua na ka na nodra rarawa kei na nodra sa kinoca lo tu ga na matavuvale vakaitalatala na dredre e mai yaco.
E ra biubiu mai na i Talatala mai na veiyanuyanu, mai na veivanua yawa era veiqaravi tu mai kina, ka sega toka ni rawarawa na lotu ni veikidavaki kei na lotu ni veitalaci.
E dau tukuni tu ni masu kei na noda tudei ena noda vakabauta ena kauta mai na veisau.
Ni sa mai tadola tale tiko na bose kei na noda qarava ena sala e galala na noda veiqaravi, esa ka levu na vakavinavinaka kina matanitu veiliutaki.
Esa kena gauna oqo me da sa na cakacaka vata ka toso ki liu na lewenivanua kece e Viti.
Meda sa vakanadakuya kece na noda duidui, ka me da kakavaka yani na veika vinaka e sa vakarautaka tu vei keda na Turaga.
Esa vakanuinui vinaka yani na Nai Lalakai vei kemuni kece sara na lewenibose Vakayabaki ena veiwasewase ni Lotu Wesele ni na qaravi vinaka kece na noda bose.
Meda na colata galugalu ga na noda kauveilatai ka muria na mawe ni yavai Jisu, o koya ena tekivuna ka na tinia na i lakolako.