Me vaka ni ra sa osota tu na veivanua volekata na Tora Bora ko ira na dauvolaitukutuku, sa dua na gauna talei vei General Ali ena veisiga me dau vakani ira e na vuqa na i tukutuku e sega soti sara tu ni dina, me raici cake ga kina okoya ni sa vakatulewataka tiko na i tosotoso ni ivalu.
Ia sa vunauci koya o George mai na CIA, me muduka nona vakaraitaki koya wavoki tiko vei ira na dauvolaitukutuku ka me kauti iratou voleka mada na kai Amerika lewe ni Delta Force ki na iyatu e liu ni veiraravui. Ke sega, sa na sega ni soli vua na iwasewase ni milioni e dau soli tiko vua ena veimacawa. Sa lai tini madua tale o General Ali ena i tukutuku oya nei George.
Sa nanuma vakabibi tale tiko ga o General Ali na $25 na milioni na dola ni Amerika sa yalataki oti tu ni na soli ki ligana e na gauna ga sa na tauri bula se tauri mate kina na yagoi Osama bin-Laden. E sega ni wili kina na vica vata tale na milioni sa na qai dau vagolei tiko mai vua e veiyabaki.
Na i karua ni nodratou sasaga na i liuliu ni Delta Force me ratou bau lako volekata yani na vanua era vuni tiko mai kina na lewe ni soqoso na Al Qaeda, eratou lai yaco koso tikoga ena vanua era toka mai kina na i yatu e liu ni mataivalu nei General Ali.
Na levu ni i taba e tauri e na siga oya, eratou saga vakaukauwa na lewe ni Delta me ratou biuta vakadroini ena mape na veivanua era toka vuni kina na Al Qaeda. E sega tikoga ni cegu na yaloi Kanala Dalton, ka ni na sega ni rawa ni ratou cakacakataka na i tuvaki dina ni vanua era tiko kina na meca, vakavo sara ke ratou toso voleka vei ira.
Ia na kena oya, sa dredre sara ga vei General Ali, baleta e kila tu na kaukauwa ni Al Qaeda kei na nodra sa toka vinaka sara na kena batikadi ena i yaragi lelevu e tiko vei ira. .
Eratou a mani lesu tale e na siga oya ki na keba, ka ka ni kurabui vei iratou na i lawalawa mai na Delta ni sa tavaki General Ali tu mai e dua tale na i liuliu ni veiyavusa ka tu vata mai kei ira nona sotia ka ra tauri dakai tale tu ga.
Na yaca ni turaga oya ko Haji Zaman Ghamshareek, e dua vei rau na i liuliu ni veiyavusa ka ra saqata tiko na veiliutaki ni Al Qaeda. E gone toka okoya mai vei General Ali, e bau vuli vakalailai ena sekeniri ka kila toka na vosa Vakaperitania.
E na gauna ni i valu kei ira na mataivalu ni matanitu levu o Rusia e na yabaki tinikarua ki liu, e bau dua vei ira na turaganivalu gone ni veiyavusa o Haji Zaman. Oti ga na i valu sa lai vakaitikotiko ki Iurope. Ia e na gauna era sa vakatolosevi tiko kina na Al Qaedfa kei ira na Taliban e Afghanistan, sa lesu tale mai me mai liutaki ira na lewe ni nona yavusa.
Dina ni rau to vata kei General Ali, ia e rau dau veisaqasaqa vakalevu ka ni tiko ga nodrau veisisivi kei na veisisivotaki. E tu vei Haji Zaman na kaukauwa me liutaka ga kina vakataki koya na nona yavusa, ia sa mai qali toka ga e yasai General Ali ena vuku ni dola ni Amerika e tasova tiko ki na kato kau nei Ali.
Na yavu levu ga ni nodrau veisisivotaki na turaga e rua oqo sa i koya nodrau saga ruarua tiko na i tutu ni i liuliu levu ni yasana taucoko o Nangarhar kei na koro levu o Jalalabad. Ni oti nodrau veikidavaki ena kena i valavala Vakaarapea, e rau dabe sobu me yadua na bilo ti. E sega wale ni dede, sa tubu nodrau veiba. E sega ni dua vei iratou na kai Amerika e kila se cava e rau veibataka.
Ena gauna eratou sa mai dabe vata kina na turaga e rua oqo kei iratou na veiliutaki ni Delta Force, a vakaraitaka tale o Kanala Dalton, ni gadreva o koya kei iratou nona i lawalawa me ratou toso voleka sara ki na vanua era tiko mai kina na Al Qaeda. Ia e kaya tiko ga o General Ali ni sega ni vinakata me mate e dua na kai Amerika, ia me vakalevutaki ga na vakalutumi ni bomu mai macawa. Sa qai curu mai o Haji Zaman ka kaya ni sega na betena na lai vakacibi i valu yawa tiko e na ruku ni ulunivanua me vaka eratou cakava tiko na mataivalu nei General Ali, e dodonu me ratou tokoni na kai Amerika ena nodratou toso volekata sara na vanua era vuni tiko kina na Al Qaeda.
A veisureti tale ga o Haji Zaman me ratou lako tale mada ki na vanua ni veiraravui ka lai saga me ratou raica na vanua era toka vuni mai kina na Al Qaeda. Eratou marau na kai Amerika e na vuku ni tukutuku oya, ka sa vakadonui me ra toso tale.
Sa sega ni dua na ka e cakava rawa kina o General Ali, ka sa mai vakamumuri tu ga yani. Sa nei Haji Zaman mada na wavoki oya.
E walu vakadua na lori e kauti iratou na i liuliu ni veimataivalu vakayavusa kei na Delta Force ka sa kuvu ga na gaunisala ni ratou sa toso vata. Ia na i vakadodorairai mai na veiulunivanua, sa digova vakamalua toka mai na ilakolako sa curuma cake yani na loma ni colo kei na kena soso damu.
E ratou a vodo na kai Amerika e na lori nei General Ali, ka ratou sa oca ga e na levu ni i tukutuku ni veivakasewasewani nei General Ali me baleti Haji Zaman. Ia e dua na itukutuku e vakaraitaka o Ali e vaka eratou lomatarotaro kina na kai Amerika.
A kaya okoya ni bogi ga ni siga kadua, a vakatara kina o Haji Zaman me ra takosova e lewe 40 na dauvakacaca ni Arapea ka ra lewe ni Al Qaeda, na vanua era yadrava nona mataivalu, me ra dro bula kina ki Pakistan.
Ni ratou lako sivita na vanua era tiko kina na i yatu e liu ni mataivalu nei General Ali, eratou lai kelea na lori ena ruku ni dua na delana, ratou qasiva cake na delana ka ratou vakatudomo me ratou dagava cake se evei soti na yasa ni veiulunivanua era toka kina nodra qaravatu na Al Qaeda.
Vakasauri sa katuvu e dua na rokete (mortar) vanataki rauta ni 100 na mita mai na vanua eratou tu kina, sega ni bera nodra sa dui cokataki ira e na ruku ni veivatu lelevu. E ono tale na rokete vanataki e lutu volekati iratou, ia e sega ni yaco sara mai na vanua eratou tu yani kina.
Ena gauna ga e mudu kina vakalailai ni se solega tu na macawa na levu ni kubou kei na kuvu, a cici vakadodonu ki cake o Kanala Dalton ka toka yani e yasana o General Ali vata kei Adam Khan. Eratou yaco sara ki na tuvuka ni delana e cake, ka lai vakadodorairai e keya ni ratou dagava cake na veiulunivanua, me vaqara nodra i vunivuni na Al Qaeda.
E sega sara ga ni bau laurai rawa e dua na qara se me dua e veitosoyaki voli. E sega tale mada ga ni bau laurai rawa na vanua era vanataki mai kina na rokete.
E tolu na ka sa vakadeitaka o Kanala Dalton baleti ira na dauvala ni Al Qaeda nei Osama bin-Laden. Matai, ni se yawa toka yani na meca, sa raici vakavinaka sara tikoga mai na ulunivanua Karua, e sega ni dua wale ga na dakai ni vanua e vanataka tiko mai na rokete, ia e vica vata; e sega ni kilai se era tiko evei. Katolu ka kena e bibi duadua: me kakua na vaqitoqito ni da vakasota kei ira na lewe ni Al Qaeda. Ko ira na dauvala era vanataka mai e vica na rokete sa kacabote oya, era sa toka vinaka sara e na i walewale ni i valu eda sega kina ni veirai mata kei na keda meca (indirect fire).
Oti e dua na gauna lekaleka ni vakadirorogo, eratou liaca na kai Amerika ni ra sa vaka ga na luve ni toa ni ra raica e dua na latui ko ira na lewe ni mataivalu nei General Ali kei Haji Zaman, ena nodra sa dui coka tale ki na veiyasa ni vatu me ra vakaruru kina.
Oqo e na nodra sa rogoca na kena sa tatagi ena veiulunivanua mai cake na rokete ni ra sa baci vanataki sobu mai, ka mira vakauca e matadratou ni ra sa kacakacabote, lako vata na vakadomobula ni veika e vakacacani.
Ena gauna oya sa yali o Haji Zaman ni sa vuni kei ira nona sotia, ia o General Ali e tu vakadodonu tu me vaka na ikelekele ni Rogovoka, sega na toso ka sega na sauriva. E vakaraitaka vei ira na meca nona yaloqaqa ka vakaraitaka vei iratou nona i tokani, vakabibi vei Haji Zaman ni o koya e tagane ka sega ni dau suka ki muri. Na wavoki oya sa nei General Ali!
E duri tu e yasana o Kanala Dalton ka vakaraitaka ni okoya kei ira nona i lawalawa lewe ni Delta Force era lako mai me ra vakasaqarai Osama bin-Laden ka ra na sega ni cegu me yacova ni sa kune. Vakalailai ga sa baci tubu nodrau veiba o General Ali kei Haji Zaman ka beitaki Haji kina o General Ali ni vakavuna nodra mai vanavanalaki. A cava sara mada na vuna era lai tiko sara kina vakaoya e liu? Sa nei Adam Khan ga na ogaoga ni vakadewa vei Kanala Dalton ena veika e rau dui kaya tiko na turaga lewe rua. Sa lai yaco na gauna me sa sega wale ga ni vakavakadewa vei Kanala Dalton, ia sa yaco tale ga me refari, me sa dautataro tiko ena kedrau maliwa o General Ali kei Haji Zaman.
Ni sa kaukauwa tiko ga vakaoya nodrau veiba, sa curu o Kanala Dalton ka vakatulewataka na i tuvatuva ni nodra suka lesu. E lewa okoya me ra veitosoya na sotia ki na veivanua duidui, me rawa ni kakua ni vagolei tiko ga kina e na dua na vanua na nodra vanavanalaki mai vei ira na meca
Era mani vakasukasuka tiko me yacova sara ni sa sega ni tarai ira rawa na rokete vanataki ni Al-Qaeda, sa yavala kece na idini ni walu na lori ka ra dui lade ki na lori cava ga e volekati ira me ra sa dro tani kina mai na buca ni mate. Era vuetaki vakaca e na siga oya e dua na i wase ni sotia nei General Ali ka vakakina nei Haji Zaman. Ni ratou yaco yani ki na buca mai ra, sa veitavaki tu mai na vugoi General Ali ka liutaka tiko na mataivalu ena i yatu e liu. A solia vei General Ali e dua na tepi ni video ka biu e na dua na laptop me saravi kina.
E koto kina na i yaloyalo ni nodratou vakararawataki ka vakamatei e na kena musumusulaki na yagodratou e walu na sotia nei General Ali ni bera ni ratou qai tawani ena taga palasitika loaloa. E vakacuva na uluna o General Ali, qumia na ligana ka kati batina.
Sa vakadeitaka o Kanala Dalton ni yaloyalo e raica oya o General Ali, sa na sega kina ni qai tu vakasuka ena nona talai iratou e so nona tamata dauvala me ra tomani iratou na kai Amerika e na nona lakovi cake o Osama bin-Laden.
Ena qai kuri tale yani.