Na kakana e sa mai vua na Kalou
Era vakabauta na wekada Lotu Idu ni kakana, na wai, na sucu, nai lavo kei na veika era rawata mera bula kina era sa mai vua na Kalou se sai solisoli kecega vakalou, ka sa dodonu mera vakayagataka ena yalo ni vakarokoroko kei na vakamuduo.
Sai koya sara talega oqori na vuna era sega kina ni dau masulaka na kedra nira vakarau kana, baleta na kana e vaka ga na lotu, ka ni vakacaucautaki kina na Kalou ena gauna ni kana, se veitalanoa kei na Kalou ena gauna e sa vakayacori tiko kina na kana.
Ka sai koya sara talega oqori na vu ni nodra dau kana cuvacuva se kana sega na veiraiyaki se kaci, baleta na Kalou e qaravi tiko. E gauna bibi na gauna ni kana. E vakatawani tiko na waqawaqa ka solia mai na Kalou, ni sa ucui koya na Kalou ka sa Kalou talega ko koya ena vakasama ni da buli na tamata meda itovo vata kei na Kalou ka ucui koya.
Eda kaya kina nai Taukei ni sega nodrai tovo baleta nira sega ni dau kaci ena gauna era kana tiko kina, baleta gona ni qarava tiko na kalou ena nona vakavinavinaka tiko vua ena gauna e kana tiko kina.
Kenai karua, na kena rokovi na kakana, me vaka nisa solia ko koya ka na kauta tani tale ko koya, sa dodonu me vakacerecerei duadua kina na Kalou.
Na kana veiraiyaki e vakaraitaka vei ira nira beca na kalou ka solia mai na kakana oqori, baleta sa vakaseva na nona vakanananu na ka e raica ka laki vakaleqa sara kina na nodrau veiyalayalati kei na Kalou, ni sa solia ko koya ka rawa ni kauta tani talega ke vakatanitaki na nona lewa.
Eda raica nai vukivuki qo ena gauna era lako kina ki cakacaka se vuli ena nodra dau ologa vinaka na kedrai vaqa na watidra se tinadra.
Oqo nai naki ni kena dau olo na roti, aya me maroroi kina na Kalou nisa ologi vata toka kina na vakanuinui nina laki vakacerecerei ka vakavinavinakataki duadua ga kina na Kalou, ka sega nina laki vakasabusabutaki se kolotaki e kavanibenu nisa raica e dua na kakana vinaka ena vanua e cakacaka tiko kina se vuli tiko kina.
Na vakanuinui e koto mai vale nina sega ni laki garova e dua na kakana ka sega ni dodonu mada ga me kania me vaka na lewenimanumanu.
Na kana lewe ni manumanu e dau kauta mai na yalo ni kocokoco kei na veigagano tale eso ka vakavuna me guilecavi kina na Kalou.
Sai koya sara talega oqori na vuna era sega kina ni dau kana lewe ni manumanu ena gauna era sokalou kina se gauna ni soqo vakayabaki me vaka na Diwali, Shiu Ratri, Krishna Janmastmi, Ram Naumi kei na vuqa tale na soqo vakayabaki era dau vakayacora ena nodra lotu.
Na lewe ni manumanu e dau veitemaki vakalevu, ni dau dreta na yalo ni tamata me vakaseva nona vakanananu ka dodonu me tiko ena mata ni Kalou ena gauna ni sokalou.
Ke caka tiko na lotu qai boi mai e dua na kuro ika vakalolo, sa macala tu ga ni vakanananu kece kei na mata sara mada ga ena gole ki na valenikuro se vanua e kuvuraka tiko mai kina nai boi kamica oqori.
Sai koya sara ga oqori na vu ni nodra sega ni dau vakarautaka se kacivaka raraba ena veisureti vakalotu nina sega na kana lewe ni manumanu. Mo qai lako tiko yani mo sa kila rawa tiko yani ni ko na sega ni laki sotava na ka o namaka tiko mai qori.
Meda kila tiko nai Taukei ni kana lewe ni manumanu e sega ni dau caka ena nodra soqo ni vakamau, somate, Diwali, Ram Naumi se soqo cava ka vakavo sara na soqo ni marau me vaka na reception nisa oti na vakamau ka sa kena bogi me laki kau mai kina o tolotolo me rau sa moce vata.
Na kana lewe ni manumanu ena rawa ni caka ena Siga ni Sucu nei Jisu ena vula o Tiseba vakavo sara ke vaka e donuya na Siga Tusiti se Vakaraubuka. Era na marautaka na siga ni sucu kei ira na wekadra ena veikakana draudrau tale eso, ia na kana lewe ni manumanu ena qai caka ena siga tarava oya na Siga Vukelulu ke Siga ni Sucu na Tusiti se Vakarauwai ke donumaka na Vakaraubuka.
Sa dodonu meda nanamaki kina baleta kevaka e sega ni lako yani ena nomuni veisureti, ni qai raica ga na siga e donumaka na Siga ni Sucu. Rawa ni qai olo vinaka ena foil ka biu tani toka na kedratou toa vavi ena virisa qai kau ga yani vua ena mataka me laki vakatakatara ka vakayagataka.
Meda nanuma tale tikoga nira sega ni dau kana bulumakau, mani cava se cava na kenai cakacaka, kari se suruwa, qori gonei sa sega tu ga vei koya.
Na kana vuaka talega e so ga vei era kania, ia levu ga era sega ni dau kania baleta ni tabu ena nodra lotu.
Vei ira na Lotu Islam se o ira na Musolomani, ni qai qarauna ga me kua ni vakaraitaki se soli vei ira na lewe ni vuaka, baleta nira sega ni dau kana vuaka na Lotu Islam.
Na bulumakau talega kei na manumanu tale eso me vaka na me, na sipi kei na toa, era na sega ni kania vakavo sara ke vakamatei ena kenai valavala vakanodra ka vakatokai me halal.
Ni qai namaka mai na kenai kuri