Ni sa vakasalataki tiko na lewenivanua dauvolivoli mo ni mai raici ratou na Matabose ni Dauvolivoli (Consumer Council of Fiji) ke ni kunea eso na nomuni voli kakana ka sega ni vinaka na kedrai tuvaki se laurai tiko kina eso na ka e sega ni dodonu me tiko kina.
Mai soli tiko na vakasala oqo ena vuku ni nodratou a lai kudruvaka vua na Matabose edua na matavuvale mai Raiwai ni ratou kunea edua nai sele ni bata ena loma ni madrai ka vakabauti ni rai a bali kei na madrai ena gauna a caka tiko kina ka mani guilecavi vakacalaka.
E ratou tukuna na matavuvale oqo ni madrai a mai kunei kina na leqa oqo, e a voli taumada mai na sitoa na Shop N Save i Nabua ena bogi ni Vakaraubuka, Epereli ka 15 ni siga.
Nai tovo dokadoka e ratou qai vakaraitaka mai nai valesilesi ni sitoa oqo ena nodratou beitaka na Dauvolivoli oya ni a rairai sosomaka beka iloma na sele ni bata me boroya edua nai yaloyalo ca me baleta na sitoa levu oqo, e vakaraitaka nai vakatagedegede ni tovo ni veiqaravi nei Shop n Save..
E rui ka bibi me ra vulica na dauveivoli oya na nodra dau valiuci ira na nodra dui Dauvolivoli ena veigauna kece e tubu koso mai kina na leqa ni ivoli ka me ra kakua ni dau biligi laivi.
Ke ra sa dau sakitaka ena nodra dui tukutuku tabaki ni o ira edua na sitoa e vabibi taka na nodra kasitaba, ia me ra varaitaka sara ena gauna e dau tubu mai kina na leqa vaoqo.
Me ra dau vulica na dauveivoli ka me ra kila ni ke sega o ira na Dauvolivoli ena sega ni toso rawa na nodra bisinisi.
Ka yaga gona kina na nodra varaici na Dauvolivoli ena nodra dui leqa vakavolivoli ka vukei.
Na leqa oqo e varaitaka vakamatata tu ni voroka tiko na lawa ni kakana vakatokai tiko vakaperitania na Food Safety Regulation 2009, ka sa va takerekere tiko na Matabose ki na Tabacakacaka ni Bula ka ratou raica vatabakidua na veika me baleta na kakana se Food Unit, me ratou totogitaki Shop n Save.
Ena tu beka eso na Dauvolivoli era na wilika tiko beka oqo se ra sa rogoca nai tukutuku oqo, ka ra sega tu beka ni kila na vanua me ra kauta kina na nodra kudru.
E vakavinavinakataka na Matabose na nodratou mai varaitaka na leqa oqo na matavuvale oqo mai Raiwai ka sa vakamasuti kemuni na Dauvolivoli o ni na rai lako curuma beka na leqa vata tikoga oqo, mo ni mai rai va na Matabose ena gauna o sota kaya kina.
Mo ni kila na Dauvolivoli ni kena toso vinaka edua na bisinisi se bisinisi cava ga, e vakatau sara tu ga vei keda.
E ka bibi gona kina na nomuni yalo vata na Dauvolivoli mo ni valataka tiko na nomuni dodonu ka gusuna tiko mai ena vukudra na kena vo tale na Dauvolivoli ena kena talaraki laivi na mataqali cakacaka vakailoa ka ra dau cakava na dauveivoli.
Ena gauna madaga oqo e via kila na Matabose se rawa vacava me lai tu ena loma ni dua na buli madrai edua nai sele ni bata?
E via kila talega na Matabose se itotogi cava ena biuta na sitoa vei koya e vacalaka taka na buli madrai, ka na rawa ni vadeitaki keda ni na sega ni yaco tale na leqa oqo?.
E sa dodonu kina vei keda na dauvolivoli me da na dau qaqarauni e na veivoli e da dau vakaitavi kina vakauasivi na veisitoa kei na veika e voli.
E dua na ka bibi talega na noda dau vakanumi ira na luveda e na veika e voli mai me da na dau raica vakavinaka baleta ni rawa ni tiko e so na veika e sega ni namaki ni na rawa ni veivakaleqai ke sega ni qarauni.
Sa dodonu me da na dau vakasalataki ira na luveda ekvaka e ra dau talai na sitoa.