OQO na i kuri ni i vakamacala ni Yavusa Kubuna me vaka eda sa wilika taumada tiko e na macawa sa oti ka vola ko Ratu Isoa Natuituba. Ni wilika sara yani.
Era sa toka kece mai Nayavu na turaga, sa ra lako yani na kai Dawasamu ka laki kerea me bau soli vei ira e dua na tiki ni vanua me ra yaco rawa kina ki waitui. Ko ira oqo na tamata ki Verata ka ra vakoro tu voleka ki Nayavu.
Era sa mai yalataki ira talega oqo me ra gole mai Valelevu, vei Vueti, me rawa kina me ra yaco rawa ki waitui se baravi. Sa mani soli vei ira na baravi ka ra vakatawana tu oqo mai Dawasamu.
Ka vaka tale kina ko ira na kai Namena, a ya ni ra laki kere vanua tale ga yani me rawa ni ra yaco kina ki waitui. Ko ira talega oqo na tamata kei Verata, e ra i liuliu ni kena bati - ka dau yacadra raraba tu kina na Na Bati kei Verata, na Yatu Nawaivono.
E a soli vei ira na kai Namena, ko ira na Tui Nawainovo, na baravi e dui tu kina na nodra veikoro e na gauna oqo.
Na vuna e ra a mai kere vanua kina ko ira kece oqo, ka soli ira vei Vueti, e baleta ni sa dredre na nodra golevi Verata ni ra sa mai toka mai Vuniwalai ko ira na kai Waimaro, a ya ko ira sa macala oti mai Nakauvadra me ra Bati kei Roko Tui Bau.
E na nodra biuti Nayavu mai na turaga, e ra mai cabe mai Malake ka takosova na veidelana vaka mai Vuna.
Sa ratou lako kece tiko e na i lakolako oqo na Vusaradave ka qai muri voli mai Nakorotubu ka vaka kina ko iratou na Matanivanua ka sega talega e toka yani mai Nayavu.
Mai kea e ra sa mai toka vakalailai e gaunisala ni a gole yani ko Vueti ki Verata.
E ra dui vakayacana na veimataqali na vei tiki ni vanua e ra toka mai toka kina e kea me i vakananumi ni kaukauwa nei Vueti mai Nakauvadra; ko ira na Sauturaga mai Mataibau kei Naqeledretaki, ko ira na Tui Kaba mai Nudukobau kei Uluibau, ko ira na Matanivanua mai Benanakaikoso.
E ra cavutu mai kea ka lako sara mai ki Nananu ka mai mate kina na turaga ka kauti ira voli ga mai Verata.
Ni sa tawa tale ko Kubuna sa ratou qai toki yani kina na Vusaradave ka ra liu voli mai.
E ratou a mai toka e Drekeinakelo kei Natavo; oti e ratou qai tawase ko i ratou mai Nadakeke kei Navitimaiwaqa ki Nakebuta kei Naisausau, ko iratou na Rokowiri ki Waitanima kei Nauaua.
E na nona tiko voli mai Verata ko Vueti e a yalayala kina vua ko Rokomoutu ka tukuna vua ni sa na tudei na nodra vakaliuci koya mai Nakauvadra e na nona a qaqa e na i valu ka a caka mai kea.
Ka ra a lewa talega kina me sa nona duadua ga na tawake; oqo na kuila ka dau toka e na i sukui ni karikaritu; ni kuila kece ni waqa ni viti e dau buki toka e na i sukui ni karikari sila.
Ka sa qai koya oqo ka qai vakayacani kina na Burekalou e Bau me ko VATANITAWAKE.
Ni namaka na kena i kuri ka tarava.