ESA vakavinavinakataka na valenivolavola liu kei ratou na veiliutaki ena vuku ni loloma kei na veikauwaitaki e vakaraitaki vei ira na wekada mai na mua-i-ra era vakaleqai ena waluvu ena vula sa oti.
Vakaraitaka o Talatala Tevita Nawadra ni sa tasoro tikoga oqo mai na valenivolavola levu na i loloma kei na kakana, na i sulu kei na i lavo me baleta na nodra na laki vukei na noda era tiko mai na yasayasa vaka- Ra.
Ena gauna oqo e sa laki biu tiko ena vale nei Talatala e Muanikau, Nasese na i yaya kece kei na kakana era vakau mai me baleta na noda ka ni loloma vei ira na wekada.
Ia esa vodo sara tikoga mai oqo ena siga Vakaraubuka na waqa na Patterson na kedra kakana dina, na tivoli, na tavioka kei na dalo me na vakau vei ira na wekada i Taukei era sa oca na kana falawa kei na raisi.
Esa sobu ga mai na waqa esa na veikauyaki sara vei ira mera kana kakana dina.
Eratou sa vakauta talega mai na wekada, na lewenilotu e Kadavu na kakana dina me na vakau mai ena dua na waqa eratou sa rawa ni vakavodoka mai kina.
O ratou na wasewase o Naitasiri era lolomataka mai na ibe, me laki conaki kina na nodra veivale na wekada era vakaleqai.
Esa vakavinavinaka sara vakalevu na veiliutaki ena vuku ni yalo ni loloma kei na noda wasea tiko na veika e tu vei keda vei ira na wekada era gadreva dina na veivuke, e kaya o Talatala Nawadra.
Vakadeitaka talega o Nawadra ni sa na qai dabe ena siga ni mataka (Vakaraubuka, 27 ni Evereli ) na komiti mena qai vakadeitaki kece kina na veika esa rawa mai, ni bera ni qai lako na i lakolako sobu kina Mua-i- Ra.
Tukuna ni sa na qai tukuni raraba yani na veika esa rawa me baleta na veivuke levu ko ni sa veivuke mai kina na lewenilotu.
Somate:
Ena siga Lotulevu e sa mai caka talega kina na lotu ni veibulu vua na i Talatala ni Wasewase o Serua, o Talatala Jona Togaciri.
E cavutu mai Cakaudrove. Ka sa i karua ni nodra i lesilesi ni Talatala Qase oqo, ni oti na nodra a veiqaravi voli mai Koro.
E sa levu sara na nodra i lesilesi ka a talatala talega ni mataivalu ena dua na gauna.
Era sa laki reguregu tiko na valenivolavola liu ena siga Vukelulu.