E SA koto oqo e ra na veivosavosa vakaviti ka da vuli tiko mai kina e na veimacawa. Ni wiliwili sara yani.
Na i vosavosa cava e cavu vua e manini se dau maqitaka na ka.
Kena i sau: Manini sautanini
Vakamacala: Na manini ni o vakayagataka vakavuku, vakamaqosa me dede, me vaka na kakana, wai se i lavo.
Qo e cavuti vua e maroroya se maqitaka na ka, vakabibi ena kakana. Ni qai via vakayagataka sa malumalumu, a sautanini na yagona.
Na i vosavosa cava kena i balebale tuvani vakavinaka vakaveitaravi.
Kena i sau: Tuvani vakabati ni beka
Vakamacala: Na beka e dua na mataqali manumanu vuka levu toka, boi levu, vakabati, vakasucuna e kiriwana, vaka na i bulibuli ni kalavo qai vakatabana mamare loaloa.
Era dau veivukayaki vakalevu na vaqara vuanikau dreu, uto vea mera misika, se na se ni onolulu, wame, kavika, vuga, niu &s mera gunuva.
Ra kosakosa vakalevu nira dau veivala.
Dau rawa mai ni lau kolo se laurabo, se kuretaki na vunikau ra moce se kana kina, se coko ena kena lawa se dai soni, qai saqa se tavu me laukana.
Na suina e caka kina na batiniveiqia, batina e tui me i taube batini beka.
E kau gona mai na i vosavosa qo i na beka ni tuvani vaka veitaravi vinaka tu na batina.
Ni dua gona na ka e tuvani vakavinaka ka vakaveitaravi tu ena qai cavuti kina na i vosavosa qo: Tuvani vakabati ni beka.
Na i vosavosa cava e cavuti vua e dua e mai cudruvaka lasulasu tiko e dua na ka e sega ni nona.
Kena i sau: Mai cudruvi au tale ena kequ vuni ivi
Vakamacala: Na ivi e dua na mataqali kauvuata vakaitamera rugurugua ni bati ni veidogo kei na lomanivanua, vakabibi ena vanua suasua, waka lelevu, vaqalita, drauilelevu babalavu vavaku dravia, se lalai vulavula boivinaka, vuailelevu toka via sababa.
Na lewena e dau saqa me laukana, se yaca me madrainiviti, bila, sikiviro, koko, soloi.
Tolona e wai ni mosinikete, se kari kei na tolo ni dawa me wai ni misuqa, se kari kei na tolo ni tarawau me wai ni ramusu.
Ni dua gona e mai cudruvaka lasulasu tiko e dua na ka e sega ni nona ena qai cavu vua na i vosavosa qo: Mai cudruvi au tale ena kequ vuni ivi.
Na i vosavosa vakaViti cava e kena i balebale ena nodrau bole mate e dua na veitau ena kaukaua ni nodrau veidredreti.
Me vaka eda rawa ni wilika ena viti lima na i talanoa nei Ravouvou ni Vunigasau kei Raluve ni Vunilagi.
Kena i sau: Dabe e ra mo vadra sola. Kau dabe e cake meu sei dora
Vakamacala: Na vadra e dua na mataqali kau vaka na voivoi, tubu e baravi kei na veitalasiga. Drauna e suluka ni sa madu, na sena na se e i saluwaki ni waiwai.
Vuana e laukana ni dreu, ni sa madu e vakayagataki me barasi ni torotoro.
Kau mai na i vosavosa qo ina vadra nida raica na sena e vaka me taqa i rua toka.
O koya gona na taqana e ra na vadra sola se na sei, e se ka vula vinaka ka boi vinaka qo gona o Raluve, ia, na taqana e cake e toka kina na sei dora se sena matailalai qo o Ravouvou.
Na levu ni nodrau veidredreti, veilomani vinaka a yaco kina me rau mate vata ga.
Na i vosavosa cava kena i balebale e sa dreve na vosa vei ira na tamata vakaduduile.
Kena i sau: A medra wai na vosa na tamata cidroi
Vakamacala: Na levu ni vosa vinaka e caka vei ira na tamata (cidroi) e sa tawa yaga ga.
Na i vosavosa cava kena i balebale i yau ni tabisa e rube e tuvuka ni i vana se karikari.
Kena i sau: i Loloku ni Laca
Vakamacala: Tabisa [vanua] (i lakolako vakavanua e waqa) cakacaka ni loloku vua na Turaga ni vanua kelevi.
E liu a dau bala i wai na laca, nikua e vesuvesu tu na i yau ena i vana, karikari mera veitautaka mai na tiko mai vanua.
Na i vosavosa cava kena i balebale vinakata na ka e dredre ke mani rawa sa vunileqa tale.
Kena i sau: Digidigia na taba ni niu e loma
Vakamacala: Eda sa kila kece na vuni niu. Qo keda taya tani mai na tabana e loma ena vuni mate ni vuni niu.
Na i vosavosa cava kena i balebale tamata se manumanu e sesevaki koya, tatabalebale me vaka na mateni na nona ivakarau.
Kena i sau: Vaka na ika duvani
Vakamacala: Na duva e dua na mataqali wa sala toloilevu toka ni baravi veivatu kei na veidogo, drau lumisa lelevu toka, se lalai piqi siawa, vua rabaraba vaka na vua ni walai.
Na wakana e tuki me mate kina na ika.
Ni dua na tamata e va qo na nona i vakarau ena qai cavuti vua na ivosavosa qo: vaka na ika duvani baleta ni tatabalebale ka sesevaki koya mai na nona i lakolako.
Na i vosavosa cava kena i balebale - sa sautu na vanua.
Kena isau: Sa masi yara na qiqi
Vakamacala: Na qiqi e dua na manumanu lailai ka dau kune vakalevu ni veiladeyaki toka ena veitaba ni kau kara tubu tu e veiruka.
E rua na kena mataqali.
E dua na qiqi senimawa - qo e koto e domona e vica na vuti karakarawa ka qai via damu toka na uluna.
Na kena i karua na qiqi tabanidolou. Na kena qo e dravu na lawena se vutina. Era dau kana vuanikau.
E kainaki ni sa vua na vuata, sa vaka me vakatorotoro o Ra Qiqi, me vaka e dua na turaga levu ni sa levu na kena ka sega na leqa. Ni tukuni qo e kena i balebale ni sa sautu na vanua.
Na i vosavosa cava kena i balebale toka welewelei ka qai dua e vei vakasagai yani, oti ka mani tagi se leqa kina.
Kena i sau: Toka mai ka sala yani na qau liga
Vakamacala: (Qo na i bole nei Ra Boila kei Ra Dabea)
Na boila e vaka na duna se bonu, dravu na kena roka. E dau veikata tale ga.
Na dabea e dua na mataqali ika ni waitui vaka na duna, dui roka rairai vinaka. E sega ni vaka na vo ni ika tale e so me vaka iriiri me rawa ni qalo kina, e dau coka ga.
Rau dau koto ga ena nodrau qara, keda sala liga yani eda na laukata dina ga.
E kau mai na i vosavosa qo i na Boila kei na Dabea baleta ke o sala liga yani ena nodrau qara, o na laukata dina ga.
Qo ke dua e toka welewelei toka ga qai dua e vei vakasagai yani ka mani tagi se leqa sara kina o koya ya ena qai cavuti kina na i vosavosa qo: Toka mai ka sala yani na qau liga.